Во Гостивар идентификувани три лица за насилството — двајца се малолетни

Полициските службеници од Одделението за внатрешни работи (ОВР) Гостивар ја идентификуваа тројцата осомничени за насилниот инцидент чија снимка се прошири по социјалните мрежи, соопшти вечерва Министерството за внатрешни работи (МВР).

Во видеото се гледа како едно момче паѓа на земја откако е удрено со клоца во главата, а додека лежи неподвижно неколку лица продолжуваат да го напаѓаат, удирајќи го со дрвена прачка која се крши од ударите.

Според соопштението, пријава за настанот била поднесена во 22:20 часот од 22‑годишниот А.В. од Гостивар. Тој навел дека истиот ден околу 02:30 часот на улицата „Борче Јовановски“ тој и неговиот пријател Л.Е. биле физички нападнати од три лица, при што биле употребени тврди и дрвени предмети.

Преземени мерки

„За настанот веднаш е известен дежурен јавен обвинител, по чии насоки и во координација со надлежен обвинител, полициските службеници од ОВР Гостивар по преземени мерки и активности ги идентификуваа тројцата учесници во насилниот настан“, се вели во соопштението од МВР.

Во полициска станица на службен разговор повикани се двајца малолетници од Гостивар, на кои им се одземени патните исправи. „Третото лице е В.Д.(20) од Скопје, за кого е испратена телеграма до СВР Скопје за понатамошно постапување“, информираат од полицијата.

Од МВР додаваат дека осомничените ќе бидат изведени пред судија на претходна постапка по скратена постапка во текот на утрешниот ден.

Фото: прес-материјал од настанот