Во Собранието стигна закон за мултифондови: помладите ќе можат ризично да инвестираат
Измените предвидуваат три портфолија со повисоки лимити за акции за помладите, а конзервативни опции за оние пред пензија.
Во Собранието е доставен предлог‑закон за воведување мултифондови во вториот задолжителен пензиски столб, со кој се предвидува делот од уплатите на помладите вработени да може да се вложува поризично со цел зголемување на приносите, додека заштедите на оние пред пензија ќе бидат заштитени со конзервативни инвестициски правила.
Предложените измени го менуваат сегашниот унифициран инвестициски режим и воведуваат три различни портфолија — растечко, балансирано и конзервативно. „Осигуреник на возраст до 45 години на живот може да избере растечко или балансирано портфолио; осигуреник на возраст од 45 години до 57 години на живот може да избере растечко, балансирано или конзервативно портфолио и осигуреник на возраст над 57 години на живот може да избере балансирано или конзервативно портфолио“, предвидуваат предложените измени.
Промени во уделите во акции
Според сегашниот закон, во странски акции може да се вложи најмногу до 30% од средствата. Со измените, растечкото портфолио дозволува вложување до 60% во странски акции, балансираното до 45%, а конзервативното до 15%. За домашни акции, досегашниот лимит од 30% се распределува на 40% за растечкото, 30% за балансираното и 10% за конзервативното портфолио.
Во вториот пензиски столб има над 3,5 милијарди евра и повеќе од 643.000 членови. Годишниот просечен принос е околу 5,5%, што ги поставува под прашање идните висини на пензиите. Приватните пензиски друштва бараа воведување мултифондови и очекуваат зголемување на приносите за меѓу 1,5 и 3 процентни поени, додека дел од економистите предупредуваат дека ова не е магично решение за проблемите на пензискиот систем.
Вториот пензиски столб беше воведен во 2006 година со цел дел од средствата на вработените да се инвестираат и да носат принос со тек на време. Денес околу две третини од задолжителните уплати одат во државниот ПИОМ, а приближно една третина во вториот столб. Предлог‑законот сега ќе помине низ парламентарна процедура и дебати.
Фото: прес-материјал од настанот
