Вонредна дератизација во Центар поради зголемена појава на глодари

Општина Центар денеска и утре спроведува вонредна дератизација во централното подрачје на Скопје, поради зголемен број пријави од граѓани за појава на глодари.

Градоначалникот Горан Герасимимовски информира дека акцијата опфаќа неколку населби и оти е изведена како непосредна реакција на пријавите од населението.

„По пријавите од граѓаните за зголемена појава на глодари, веднаш реагираме на терен. Ќе ја следиме состојбата и во наредните денови и, доколку има потреба, ќе реагираме и на други локации. Ги повикувам граѓаните да продолжат да ни пријавуваат каде има проблем, за да можеме навреме да постапиме“, порача Герасимимовски во објава на Фејсбук.

Каде се врши третманот

Во рамките на акцијата ќе бидат опфатени локации во Капиштец, Дебар Маало, Буњаковец и Кале. Тимовите ќе третираат околу контејнери и шахти, на пазарчето во Буњаковец, како и на потегот од основното училиште „Јохан Хајнрих Песталоци“ до Амбасадата на Грција.

Понатаму, третманите се предвидени и кај бараките на Јавното претпријатие „Комунална хигиена“, како и во близина на објектите на Институтот за спортска медицина и Царинската управа кај Кале.

Општина Центар апелира до граѓаните да внимаваат при движење на наведените локации додека трае акцијата и најави дека ќе ја следи состојбата и ќе интервенира и на други точки ако се појави потреба.

Фото: прес-материјал од настанот