„Земете ја сегашноста во свои раце, ако сакате да влијаете на иднината“ — им порача Сиљановска на младите

Претседателката Гордана Сиљановска‑Давкова ги повика младите активно да се вклучат во процесите на одлучување и во креирањето на политиките ако сакаат да влијаат врз иднината, на денешната дискусија на тема „Меѓуврсничко насилство и вандализам: Млади, училишта и дигитален простор“ во претседателската вила „Билјана“ во Охрид.

„Иднината припаѓа на младите“ не смее да значи занемарување на сегашноста

Сиљановска‑Давкова предупреди дека често користената порака дека „иднината им припаѓа на младите“ не смее да се претвори во оправдување за занемарување на нивната сегашност и активна улога во општеството. „Јас понекогаш велам дека можеби ние возрасните, само заради таа фраза „на младите им припаѓа иднината“, ја осиромашуваме сегашноста. Земете ја сегашноста ако сакате да влијаете врз иднината. Затоа вклучувањето во процесот на одлучување на младите, не само во Собранието, на сите нивоа, во училиштата, е важно“, порача Сиљановска.

Таа посочи дека борбата против насилството не смее да се редуцира на бројки и статистики, бидејќи позади секој случај стои конкретна личност со чувства, желби и достоинство. Во тој контекст претседателката ја нагласи улогата на непосредното дружење и човечкиот контакт, особено кога голем дел од комуникацијата на младите се одвива во дигиталниот простор.

Сиљановска‑Давкова зборуваше и за вербалното насилство и за влијанието на говорот врз младите — предупредувајќи дека навредите, омаловажувањето и нетолеранцијата се форми на насилство што често се потценуваат и дека наместо да се создава култура во која насилството е прифатен начин на комуникација и решавање конфликти, младите треба да се учат на љубов, почитување и ненасилно однесување.

„Мораме систем да создадеме….Сите треба да се активираме за да градиме култура на разбирање, мировна култура, наместо култура на страв… Спорт, музика, култура, активност – нема поважни средства за ангажирање и, ако сакате, за демилитаризација на мислите кои што се присутни на мрежите или, ако сакате, за миротворство“ рече претседателката Сиљановска‑Давкова.

Министерката за култура Весна Јаневска изрази загриженост дека агресијата меѓу младите станува сѐ побрутална и дека, уште поопасно, насилството често се снима и се објавува на социјалните мрежи. „Имам впечаток дека е многу зголемена агресијата, можеби е само повидлива и повеќе пријавена, но сметам дека станала побрутална. Во минатото децата ќе се степале, имало туркање, докачување и така натаму, но сега имаме гасење цигари врз тело, имаме бодење со нож, имаме понижување во најгрубата форма која може да постои на едно човечко суштество. И она што е најстрашно, и еднакво страшно, е апатичното гледање, па дури и снимањето на телефон и постирањето на мрежите,“ рече Јаневска.

Јаневска нагласи дека семејството е еден од важните фактори зад агресивното однесување, но дека влијание имаат и медиумите и дигиталниот простор. Министерството за образование и наука, заедно со Комората на психолози, спроведува обуки за наставниците за препознавање на раните знаци на агресија и семејни проблеми — досега опфаќајќи 30 општини. Меѓу предложените мерки се програми за превенција од насилство во училиштата, поголемо присуство на наставниците во ходниците и училишните дворови, прирачници за справување со врсничкото насилство и активности против кибер‑насилството. Јаневска најави и законско решение со кое се предвидуваат казни за родителите на деца кои вршат насилство.

„Менувањето на менталитетот не е нешто што се случува денес‑утре, тоа е процес што трае и кој не може да го направи само семејството, само училиштето – тоа го прави целото општество. Не е флоскула кога велиме „иднината е во младите“. Тоа е реалност. Ако ја искористиме заеднички сегашноста, ќе направиме подобра иднина“ рече Јаневска.

Фото: Гордана Силјановска-Давкова / Фејсбук