Земјава повторно на грчката листа на држави со привилегиран даночен режим

Нашата држава се најде меѓу вкупно 42 земји што Грција ги вброи на списокот на држави со „привилегиран даночен режим“ за даночната 2024 година, одлука чиешто цел е да ја идентификува територијата каде даночните стапки за правни лица се значително пониски отколку ако тие биле даночни резиденти или имале постојана деловна активност во Грција.

Министерската одлука со наслов "Определување на државите кои имаат привилегиран даночен режим, врз основа на одредбите од ставовите 6 и 7 на член 65 од Законот 4172/2013, за даночната 2024 година" е објавена во Службен весник на Грција и е потпишана од министерот и заменик-министерот за национална економија и финансии, Кирјакос Пиеракакис и Димитрис Маркопулос.

Критериумот што се применува

Како критериум за вклучување, одлуката наведува дека „правното лице или правниот субјект подлежи на данок на добивка, приходи или капитал, чија даночна стапка е еднаква или пониска од 60 отсто од даночната стапка на правните лица и правните субјекти што би ги должеле согласно одредбите на грчкото даночно законодавство", доколку тие би биле даночни резиденти или би имале постојана деловна активност во Грција.

Врз основа на овој критериум, за даночната 2024 година, на грчката листа се наоѓаат 42 земји и територии. Од Европа, покрај нашата, се наведени Албанија, Андора, Бугарија, Кипар, Косово, Босна и Херцеговина, Црна Гора, Монако, Унгарија, Ирска, Лихтенштајн и Молдавија.

Вклучувањето на некоја држава на таков список има административни последици при третманот на даночните прашања со прекуграничен карактер; правните лица поврзани со наведените територии може да бидат предмет на засилена контрола според грчките правила кои имаат за цел да ги ограничат даночните бенефиции од пониските стапки.

Слични листи редовно се ажурираат, а оваа министерска одлука формализира кои држави исполнуваат наведениот критериум за даночната 2024 година.

Фото: прес-материјал од настанот