„12 часа вода – 12 часа прекин“: воведен режим на водоснабдување во Булачани

25 август 2026 — Јавното комунално претпријатие „Гази Баба 2007“ соопшти дека воведува временски режим на водоснабдување поради екстремно високите температури кои предизвикаа намалување на водотекот и дотокот од природните извори и поради драстично зголемена потрошувачка.

Режимот се однесува првенствено на водоводната линија Булачани 1 и има за цел да обезбеди основна стабилност и рамномерна распределба на ограничените ресурси.

Распоред на снабдување

Според соопштението од претпријатието, режимот ќе се спроведува по следниот распоред:

• Со вода (12 часа): од 07:00 до 19:00 часот
• Без вода (12 часа): од 19:00 до 07:00 часот

Од ЈКП „Гази Баба“ апелираат до сите жители на рационално и одговорно користење на водата за пиење и строго избегнување на нејзино ненаменско трошење (како поливање бавчите или полнење базини), со цел да се спречи дополнителен колапс на системот.

За контрола на состојбата на терен, екипи на претпријатието во координација со инспекторите од Општина Гази Баба веќе вршат засилен надзор над користењето на водата и почитувањето на воведениот режим.

Мерките и воведениот временски режим ќе останат на сила сè додека не се подобрат хидролошките услови и дотокот од природните извори.

Фото: прес-материјал од настанот