АХВ: Од Турција обезбедени 500.000 дози вакцини против сипаници, побарани и од ЕУ

Агенцијата за храна и ветеринарство (АХВ) и Министерството за земјоделство, шумарство и водостопанство соопштија дека е обезбедена донација од 500.000 дози вакцини од Турција, кои се очекува да пристигнат деновиве, а дополнителни количества се побаруваат и од Европската комисија.

Надлежните велат дека епидемиолошката ситуација постојано се следи, дека се преземаат сите потребни мерки и дека е доставено барање за стручна поддршка до тимот EUVET на Европската комисија.

„Повторно е побарана и стручна поддршка од тимот EUVET на Европската комисија. Пред примената, вакцините задолжително ќе бидат лабораториски испитани за безбедност и чистота, а вакцинирањето ќе започне по потврдувањето на резултатите, според официјален план и под контрола на Агенцијата за храна и ветеринарство“, велат од ресорното министерство.

Нема самоволно вакцинирање — ќе следат санкции

Од АХВ предупредуваат дека секоја вакцинација што сточарите ќе ја извршат самостојно и на свој трошок, без претходно одобрение од АХВ, ќе биде санкционирана и дека за тие животни нема да се врши компензација доколку заболат или бидат одземени.

Надлежните укажуваат дека неконтролираната примена на вакцини може да го отежне епидемиолошкото следење, да ја намали ефикасноста на преземените мерки и да создаде дополнителен ризик за стадата.

Системот за рано откривање и сузбивање се спроведува преку ветеринарните друштва со кои АХВ има склучено договори: по секоја пријава за сомнителен случај, ветеринарите земаат крв и брисеви и ги доставуваат на лабораториско испитување. Реакцијата на надлежните следува по предупредувањето од Сојузот на одгледувачи на овци дека до сега се угинати 7.000 до 10.000 овци и по нивното барање за итна вакцинација и формирање посебен фонд за обесштетување на сточарите.

Фото: прес-материјал од настанот