„Амазон“ гради дата‑центар во Кожани со 300 мегавати почетна моќност

ДЕИ и американската компанија „Амазон веб севисис“ потпишаа меморандум за изградба на голем дата‑центар во Кожани, објавија грчките власти во текот на минатата недела. Проектот во првата фаза ќе располага со влезна електрична моќност од 300 мегавати и, според официјални лица, е меѓу најголемите инвестиции што во моментов се реализираат на глобално ниво.

Вицепремиерот на Грција Костис Хаѕидакис, при посетата на северозападна Грција, истакна дека локацијата која со децении ја снабдувала земјата со електрична енергија може да прерасне во центар за современи облачни и ИИ‑инфраструктурни капацитети и дека проектот ќе донесе значителен економски импулс за регионот.

Капацитети и вработување

За време на изградбата, според Хаѕидакис, ќе бидат ангажирани стотици работници, а во првата работна фаза со капацитет од 300 мегавати се очекуваат 400–500 вработени, најчесто научници и технички стручњаци.

Тој нагласи дека постои можност капацитетот да биде зголемен до еден гигават, по што вработеноста на локацијата би можела да достигне до околу 1.500 лица. Проектот е дел од поширок инвестициски пакет на ДЕИ за северозападна Грција, кој вклучува обновливи извори, складирање енергија и проекти за зелен водород и кој, според проценките, ќе создаде повеќе од 5.000 работни места.

„Местото што со децении ја снабдуваше земјата со електрична енергија сега може да биде домаќин и на најсовремени инфраструктурни капацитети за облак и вештачка интелигенција“ — нагласи Костис Хаѕидакис.

„И лично сум многу задоволен од оваа инвестиција бидејќи во 2019 година како министер за животна средина и енергетика ја презедов ДЕИ во состојба на работ на пропаст. Денес зборуваме за една сосема поинаква ДЕИ, која може да придонесе кон енергетската транзиција на Западна Македонија на многу позитивен начин, но и веќе придонесува за Грција многу побргу да чекори кон иднината“ — посочи Хаѕидакис.

Фото: прес-материјал од настанот