Kërkesa globale për udhëtime ajrore ra 1,7% në qershor, lufta me Iranin fajësohet për rënien në Lindjen e Mesme

Kërkesa globale për transportin ajror të udhëtarëve në qershor u ul me 1,7 për qind në krahasim vjetor, kryesisht për shkak të rënies së ashpër të trafikut në Lindjen e Mesme të shkaktuar nga lufta me Iranin, si dhe për shkak të kërkesës më të dobët vendore në Kinë, SHBA dhe Japoni, njoftoi Shoqata Ndërkombëtare e Transportit Ajror (IATA).

Kapaciteti i përgjithshëm i kompanive ajrore, i matur në kilometra ulësesh të disponueshme, u ul me 1,3 për qind, ndërsa koefiçienti i ngarkesës së pasagjerëve u ul me 0,4 pikë përqindjeje në 84,2 për qind.

Nëse nga llogaritjet përjashtohen të dhënat për Lindjen e Mesme, kërkesa globale do të ishte ulur vetëm me 0,6 për qind, shumë më e moderuar.

Transporti ndërkombëtar dhe vendas

Transporti ndërkombëtar i udhëtarëve u ul me 0,9 për qind krahasuar me të njëjtin muaj të vitit të kaluar, por pa Lindjen e Mesme u shënua një rritje prej 1,1 për qind. Kapaciteti ndërkombëtar shënoi një rënie prej 0,6 për qind, ndërsa treguesi i mbushjes ishte 84,2 për qind.

Kërkesa vendore shënoi një rënie prej 3 për qind, me ulje të kapacitetit për 2,4 për qind dhe një shkallë mbushjeje prej 84 për qind.

Rënia më e madhe u regjistrua tek kompanitë ajrore të Lindjes së Mesme, ku kërkesa ndërkombëtare u ul me 14 për qind, ndërsa kapaciteti me 11 për qind. Shkalla e tyre e mbushjes u ul me 2,6 pikë përqindjeje. IATA njofton se konflikti i armatosur me Iranin vazhdon të ndikojë fuqishëm në trafikun ajror të asaj zone, megjithatë shpejtësia e rënies është përgjysmuar që nga prilli, pasi kompanitë ajrore gradualisht po normalizojnë operacionet e tyre.

"Kërkesa globale për transportin ajror në qershor ishte 1,7 për qind më e ulët në krahasim me vitin 2025," tha drejtori i përgjithshëm i IATA-s, Vili Volsh. Ai paralajmëroi se ripërtëritja e tensioneve dhe çmimet më të larta të karburantit do ta vështirësonin rikuperimin e rajonit dhe mund të rrisnin më tej çmimet e biletave ajrore.

Ndryshe nga Lindja e Mesme, kompanitë ajrore evropiane shënuan një rritje prej 1,5 për qind të kërkesës ndërkombëtare, ndërsa linjat midis Evropës dhe Azisë regjistruan një rritje prej 11 për qind, që është rezultati më i lartë mes korridoreve kryesore ndërkombëtare ajrore. Kompanitë nga Azia dhe Paqësori regjistruan një rritje të kërkesës prej 0,4 për qind, megjithëse kapaciteti u ul me 1,1 për qind — IATA thekson se çmimet më të larta të karburantit kanë detyruar disa transportues të reduktojnë fluturimet në linjat më të shkurtra aziatike. Rritja më e fortë e kërkesës u shënua te kompanitë ajrore afrikane – 6,7 për qind, të ndjekura nga transportuesit e Amerikës Latine me rritje prej 3,5 për qind. Tek kompanitë e Amerikës së Veriut, kërkesa ndërkombëtare është ulur me 1 për qind, ndërsa kapaciteti me 0,7 për qind.

Foto: material i shtypit nga ngjarja