Бесплатен Wi‑Fi на 72 локации во 64 општини, регистрирани над 200.000 корисници

Бесплатен безжичен интернет со брзина од 200 Mbps е достапен на 72 локации во 64 општини низ Северна Македонија, проектиран со поддршка од Европската Унија и Германија. Преку мрежата досега се регистрирани повеќе од 200.000 корисници, а пренесени се над 115 терабајти податоци.

Овие податоци беа претставени на завршниот настан на проектот „ЕУ за Западен Балкан - Wi‑Fi во Северна Македонија“, кој го спроведе ГИЗ во координација со Министерството за дигитална трансформација и „Македонски телеком“.

Евроамбасадорот Михаил Рокас го оцени проектот како конкретен пример за соработка во рамките на „Тим Европа“ и потврда за значењето што Европската Унија го придава на дигиталната поврзаност.

Фокус на дигиталната инклузија

Германската амбасадорка Петра Дрекслер нагласи дека суштината на иницијативата е дигиталната инклузија и обезбедување еднаков пристап до информации, образование и јавни услуги, без оглед на местото на живеење и финансиските можности на граѓаните.

„Свесни сме дека руралните и планинските подрачја сè уште немаат соодветна интернет-покриеност, па затоа треба дополнително да ги засилиме напорите и пристапот до интернет да го направиме достапен и финансиски прифатлив за секој граѓанин. Истовремено, треба подобро да ги промовираме нашите активности и да обезбедиме сите да бидат информирани за нив, вклучително и туристите“, рече Рокас.

„Дигиталната инклузија не се однесува на тоа дали повеќето од нас можат да пристапат на интернет каде било и во кое било време, туку дали тоа можат да го направат сите. Јавниот Wi‑Fi е како јавен парк или библиотека – дел од дигиталната инфраструктура што им припаѓа на сите. Тој овозможува пристапот до информации, образование и јавни услуги да не зависи од големината на нечиј пакет за мобилен интернет или од квалитетот на мобилната мрежна покриеност“, посочи Дрекслер.

Министерот за дигитална трансформација Стефан Андоновски рече дека првичниот план бил проектот да опфати околу 40 општини, но поради големиот интерес од локалните самоуправи опфатот е проширен на 64 општини и 72 локации. Тој додаде дека преку мрежата досега се пренесени повеќе од 115 терабајти податоци, што покажува дека инфраструктурата активно се користи, и како можни локации за следната фаза ги наведе: Свети Наум, Дебарското Езеро, Маврово и Кокино.

Фото: прес-материјал од настанот