Битолската болница вработи 82 лица, но статусот на волонтерите останува неуреден

Во Клиничката болница во Битола се реализирани 82 вработувања на неопределено време, кои според управата ја зацврстуваат екипираноста на установата, но статусот на група медицински и немедицински работници кои од декември работат како волонтери без паричен надоместок сѐ уште не е решен.

При посетата на болницата, премиерот Христијан Мицкоски беше пријден од граѓанин кој јавно го запраша што ќе се случи со волонтерите оставени без надомест. Граѓанинот му порача: "Статусот не им е регулиран, а работат повеќе од вработените што се на плата".

Мицкоски го упати прашањето до директорката и до министерот за здравство. Д-р Ненси Лозанче рече дека болницата постојано апелира кај надлежните институции за да се најде правно решение, но дека одговор нема. Таа изјави: "Имаа договори на дело кои траеја до декември, тие согласности истекоа, побаравме да добиеме согласност за понатамошни договори или вработувања, но одговор немаме. Желба е на волонтерите да доаѓаат на работа, а ние мораме правно да го регулираме статусот. Работат како што треба да се работи во болницата и се надевам дека во најскоро време ќе се реши, нашите заложби се постојани, сме во постојата комуникација и со Министерството за здравство, Министерството за финансии и Фондот за здравство".

Министерот ветува информирање

Министерот за здравство Сашо Клековски кажа дека ја презел обврската да ги информира надлежните и јавноста до 4 август за тоа до каде е стигнат случајот. При обиколката премиерот беше запознаен и со новите инвестиции, опрема и со вработувањата во болницата.

Директорката посочи дека болницата е опремена со нова апаратура меѓу која колоноскоп, апарат за оптичка кохерентна томографија, Декса апарат и друго, а со помош на општествено одговорни компании е изграден современ влез. Таа додава дека започната е соработка со Универзитетската клиника за онкологија и радиотерапија во Скопје, па доктори од таму доаѓаат во Битола за да ги лекуваат онколошките пациенти, а е склучен и договор со доктор од Клиниката за педијатрија за да служењето на деца со атипичен развој се врши во Битола, наместо тие да патуваат кон Скопје.

Клековски истакна дека е неопходна децентрализација на здравствени услуги и најави дека терапијата за мултиплекс склероза во иднина ќе може да се прима и во Битолската болница, покрај Скопје.

Фото: Влада на РСМ)