Божиновска: Снабдувањето со струја е стабилно, за горивата РКЕ ќе одреди в понеделник (2 ноември 2026)

Министерката за енергетика, рударство и минерални суровини, Сања Божиновска, изјави на 29 октомври 2026 дека производството на електрична енергија е стабилно и дека ЕСМ обезбедува сигурно снабдување на граѓаните, додека конечната одлука за цените на горивата ќе ја објави Регулаторната комисија за енергетика (РКЕ) в понеделник, на 2 ноември 2026.

Божиновска: Почекајте ја одлуката на РКЕ за горивата

На отворањето на Саемот за енергетика, технологија и иновации „Енерго технома 2026“, министерката рече дека Министерството на дневна основа ги следи цените на гасот и дека ЕСМ веќе е во преговори за подолгорочно и поконкурентно снабдување по пониски цени. Таа додаде дека ЕВН би требало наскоро да го објави и тендерот.

Во одговор на прашања од новинари, Божиновска нагласи: "Оваа Влада е многу одговорна, не дозволи никакви ценовни шокови. Имавме најевтини цени на горивата. Тоа што компаниите поднесуваат до РКЕ е едно, зашто вие може да барате и да си дадете ваши пресметки. Но, РКЕ ќе одлучи каков ќе биде крајниот исход. Ве замолувам да ја почекаме одлуката на Регулаторна, да видиме на крај каква ќе биде нејзината одлука и колку ќе има поскапување, ако има. За цената на струјата, сведоци сме дека беше и до 1.000 евра во минатото. Но, тоа е берза, понуда, побарувачка, реагира на геополитички случувања. Знаете дека имаме сериозна војна. По 2022 година има геополитички поместувања кои влијаат на финалните цени. Ние имаме стабилно производство, ЕСМ се грижи за сигурно снабдување на нашите граѓани," истакна Божиновска.

Министерката посочи дека до сега беа преземени мерки за ублажување на ценовниот удар — намалување на акцизата и ДДВ-то, како и повремени попусти од компанијата ОКТА кои, според неа, се уште се на сила до следната недела.

Божиновска објасни дека кога Владата дојде на власт, произведената електрична енергија чинела над 135 евра за мегават-час, а моменталната цена по која продава ЕСМ е 65 евра, што, како што рече, претставува свесно отстапување заради заштита на стандардот на граѓаните. За евентуалните субвенции, рече, ќе се разговара во зависност од финансиските импликации.

Во однос на регионалните гасоводи, министерката беше категорична дека изборите во Србија нема да го нарушат текот на проектите: "Промените на политичката сцена во Србија сигурна сум дека нема да имаат никакво влијание. Ние со северниот сосед ќе бидеме нов начин на алтернативно снабдување на цела Европа со гас. Не верувам дека тука ќе има некои поместувања кога станува збор за политичките случувања. Што се однесува до гасоводите, заедно со Република Грција константно ги гледаме роковите, ништо се нема одложено, важи тоа што го имаме кажано и на рокот сме. Значи, следната година околу јуни треба да биде завршена трасата до Република Грција, тие 68 километри, а во август се избра изведувач и за северната граница, за тие 22 километри. 2028 е година кога ќе биде целата граница завршена. Изборите во Србија нема апсолутно ништо да пореметат. Ние имаме зацртано еден гантограм на активности и тука сме добри со термините. Нема никакво поместување," подвлече Божиновска.

Фото: прес-материјал од настанот