Охрид ги зголеми цените на водата за 3 денари по кубик; сметки и притисок пред зимата

Општинскиот совет на Охрид денеска изгласа нов тригодишен тарифник за водоснабдување со кој цената на водата ќе се зголеми за 3 денари по кубен метар. Според одлуката, цената на водата ќе биде зголемена вкупно за 16% до 2029 година, додека кај правните лица порастот изнесува 20%.

Според проценките, семејство кое просечно троши меѓу 10 и 15 кубици ќе добие сметка повисока за околу 40 денари почнувајќи од 1 јануари. Опозицијата бурно реагира и го оценила потегот како нов удар врз џебот на граѓаните во услови кога и другите давачки се во раст кон почетокот на грејната сезона.

Од „Водовод" појаснуваат дека растот на цената во овој период е неизбежен и усогласен со тарифникот на Регулаторната комисија за енергетика.

Енергетски притисок пред зимата

Поскапувањето на локално ниво се случува во чувствителен момент, откако национално се најавуваат повисоки цени на струјата. ЕСМ ги пресметува новите трошоци и до средина на ноември треба да достави анализа до Владата за новата цена по која ќе ѝ ја продава струјата на „ЕВН Хоум" од јануари, додека актуелната цена изнесува 65 евра за мегават‑час.

МЕПСО побара зголемување на преносната тарифа за над 98%, но Регулаторната комисија нагласува дека тоа не значи автоматско пренесување на истиот процент кон сметките на домаќинствата. РКЕ ги разгледува пресметките на останатите енергетски компании; конечниот товар за граѓаните ќе зависи од владините одлуки и финалните мрежни трошоци.

Дополнителен притисок врз буџетите на домаќинствата претставува и фактот дека потрошувачката на електрична енергија веќе е порасната и до 23% во однос на лани, што ги загрижува граѓаните пред сезоната на греење.

Фото: прес-материјал од настанот