Денес е споменот на Светиот свештеномаченик Антим

Денес црквата го одбележува споменот на Светиот свештеномаченик Антим, епископ кој го храбрел своето стадо во едно од најжестоките гонења на христијаните во Римската империја.

Свети Антим е роден во Никомидија и од детството воспитан како вистински христијанин. Во неговиот живот се согледуваа добродетели поради кои беше поставен за епископ: умртвено тело, смирен дух, љубов кон сите и ревност кон славата Божја.

Тој епископствуваше во Никомидија во времето на жестокото гонење под свирепите цареви Диоклецијан и Максимијан. Особено во Никомидија христијанската крв се лееше во потоци: „Една година на денот на Христовото Рождество во еден храм беа изгорени дваесет илјади маченици“ (види под 10 јануари). Гонењето продолжи — многумина беа фрлени во затвор за маки и убивање.

Повлекување за охрабрување и заробување

Антим се повлече во селото Оман не за да ѝ побегне на смртта, туку за одтаму да го храбри својот народ и да спречи отпад. Едно од неговите писма до христијаните во затворот беше фатено и предадено на царот Максимијан.

Царот испрати дваесет војници да го фатат. Белокосиот и прозорлив старец ги пречека, ги нагости и потоа им кажа дека тој е Антим за кого што го бараат. Војниците, восхитени од неговата добрина, му нудеа да се сокрие, но тој одби да го спаси својот живот со лага и појде со нив. По преданиот летопис, војниците поверуваа во Христа и примија крштение од епископот.

Свети Антим беше изведен пред царот, долго и жестоко мачен, и најпосле беше отсечен со секира. Тој го прослави Господа и се упокои во Него на почетокот од 4 век.

Фото: прес-материјал од настанот