Дисциплинската комисија ја укина казната на Јове Цветановски — може да конкурира за обвинител за организиран криминал

Дисциплинската комисија која претходно му изрече дисциплинска мерка на јавниот обвинител Јове Цветановски ја укина таа мерка на итен состанок што се одржа додека сè уште траеше летната ферија, со што му се отстрани формалната пречка да учествува на огласот за Јавен обвинител за гонење на организиран криминал и корупција — местото на Ислам Абази чиј мандат истекува.

Истовремено, како виш обвинител, Цветановски достави мислење со кое побара покренување на прекинатата истрага за мазутот во ТЕЦ Неготино — истрага во која Обвинителството за организиран криминал не утврди штета по државниот буџет — по јавните повици на премиерот Христијан Мицкоски, министерот за внатрешни работи Панче Тошковски и по секојдневните прес‑конференции на владејачката ВМРО‑ДПМНЕ.

Укинување на мерката, но обвинение сè уште стои

Со дисциплинска мерка, обвинител не може да се пријави на оглас за нова функција или унапредување. По укинувањето на мерката, Цветановски се пријави на огласот, но останува нерешено обвинението што се води пред Основниот суд Штип и кое веќе година дена чека оценка.

За својата промена на ставот, Дисциплинската комисија се повика на насоките добиени од Советот на јавните обвинители. Во писмен одговор, Комисијата изјави: "Комисијата за утврдување на дисциплинска одговорност на јавен обвинител во вршењето на јавнообвинителската функцијата, врз основа на насоките добиени од Советот на јавните обвинители во жалбена постапка и имајќи ги предвид доказите, со мнозинство гласови донесе одлука со која не утврди дисциплинска одговорност на јавниот обвинител против кого се водеше постапка."

Од кабинетот на Државниот обвинител Ненад Савески ни беше соопштено дека тој нема да поднесе жалба против таа одлука. Како одговор добивме: "Одлуката е доставена до Јавниот обвинител на Република Северна Македонија и тој нема да вложи жалба, имајќи ја предвид аргументацијата изнесена во образложението на одлуката".

Тоа практично го отстрани формалниот блок за Цветановски, кој конкурира на огласот што завршува в понеделник.

Обвинителниот акт против Цветановски е спарен во истиот предмет со обвинението против Мустафа Хајрулахи и веќе околу една година не добива оценка од судот. "Еднаш беше стигната жалба до Апелациониот суд Штип откако судијката од Основниот суд Штип одби да се издвојат односно да отпаднат докази од обвинението. Ние ја потврдивме таа нејзина одлука. Предметот се враќа повторно кај истата судијка и таа ја носи истата одлука. Пак стигнува жалба до Штипска апелација од еден од обвинетите, на 20 август. Ние веднаш предметот го испративме на мислење до Вишото обвинителство на Штип и еве 15 дена немаме одговор. Штом стигне мислењето, веднаш ќе одлучиме и обвинението ќе може да оди на оценување во Основниот суд Штип", ни изјави претседателот на Штипска апелација Тони Делев.

На 9 септември лани Основното јавно обвинителство Штип поднесе обвинение против Хајрулахи и обвинителен предлог против Цветановски. По целосно спроведена истражна постапка и обезбедени докази, ОЈО Штип го товари Хајрулахи со пет кривични дела — Малтретирање при вршење на службата по член 143 и Злоупотреба на службената положба и овластување по член 353 став 1 од Кривичниот законик.

Во текот на истражната постапка, обвинителот обезбедил докази и за службеното постапување на Хајрулахи и на Цветановски и поднел обвинителен предлог со кој ги товари дека како соизвршители сториле продолжено кривично дело Злоупотреба на службена положба и овластување по член 353 став 1 од КЗ.

Во обвинителниот предлог се вели: "Обвинетите, во временскиот период од јануари 2023 година до август 2024 година, во ВЈО Скопје, заедно спротивно на Правилникот за внатрешно работење на јавните обвинителства, примените писмена кои по отворањето, му биле предавани од страна на овластениот јавнообвинителски службеник за прием, првообвинетиот Хајрулахи ги задржувал и барал да не бидат заведени истиот ден или редоследно, туку да бидат заведени неколку дена подоцна и под различен датум од приемниот. Истовремено барал од службениците тие предмети директно ‘без многу галама’ да бидат доделувани на второобвинетиот Цветановски."

Обвинението додава дека обвинетите не ја извршувале својата службена должност согласно член 7 од Законот за јавното обвинителство — односно ја извршувале функцијата незаконито, пристрасно и субјективно, без почитување и без заштита на слободите и правата на човекот и граѓанинот и правата на други правни субјекти, надвор од надлежностите, со намера да им овозможат имотна корист на други, со што сериозно ги повредиле правата на странките во неколку постапки.

Фото: СДК.МК)