Доградба и нов систем за греење за ООУ „Гоце Делчев“ во Горно Лисиче
Доградбата ќе донесе шест нови училници и две канцеларии, а во рамки на проектот ќе се постават топлински пумпи за училиштето, салата и градинката „Буба Мара“.
Основното училиште „Гоце Делчев“ во Горно Лисиче се доградува — во тек е изградба на нов дел во кој ќе бидат сместени шест училници и две помали канцеларии, а паралелно се работи и на унапредување на системот за греење.
Поставување топлински пумпи за училиште, сала и градинка
Проектот за подобрување на системот за греење предвидува поставување на топлински пумпи и опфаќа не само ООУ „Гоце Делчев“, туку и спортската сала и градинката „Буба Мара“. Активностите се реализираат согласно со Меморандумот за соработка меѓу УНОПС и Општина Аеродром.
Доградбата се состои од сосема нов дел на објектот со шест училници и две помали канцеларии, кои ќе обезбедат дополнителен простор за настава и административни потреби.
"Инвестираме во образовната инфраструктура затоа што сакаме нашите ученици да учат во современи, квалитетни и ефикасни услови. Доградбата на ООУ „Гоце Делчев“ и новиот систем за греење се конкретни инвестиции кои значат подобри услови денес, но и создавање подобра иднина за нашите деца," вели градоначалникот Дејан Митески.
Општина Аеродром најавува дека ќе продолжи со реализација на проекти насочени кон модернизација на училиштата и подобрување на условите за учениците, наставниците и целиот воспитно-образовен процес.
Фото: Општина Аеродром