Доизградбата на новата Клиничка болница во Штип ќе чини 109 милиони евра

На 30 јули 2026 година министерот за здравство Сашо Клековски, директорот на Фондот за здравствено осигурување Златко Перински, градоначалникот на општина Штип Иван Јорданов, претставници на Клиничката болница во Штип и делегација на Светската банка одржаа средба за завршување и целосно опремување на новиот болнички комплекс во Штип.

Планираната инвестиција изнесува речиси 6,7 милијарди денари, односно 109 милиони евра, со цел Источниот регион да добие модерен регионален здравствен центар. Проектот опфаќа доизградба на главниот објект, набавка на современа медицинска опрема и функционално поврзување на одделенијата.

За целите и значењето на проектот министерот кажа: "Завршувањето на Клиничката болница во Штип е долг кон граѓаните на источна Македонија. Сакаме овде пациентите да добиваат навремена и квалитетна здравствена услуга, а здравствените работници и студентите да имаат современи услови за работа, практична настава и професионален развој" - вели Клековски.

Ревизии, тендер и временски рамки

На состанокот беа разгледани техничките и финансиските анализи, моделот на финансирање, проектната документација и механизми за контрола на квалитетот, трошоците и роковите. Како што беше соопштено, ревизиите на постојната состојба се очекува да бидат готови за два месеци, што ќе биде основа за објавување меѓународен повик за доизведба.

„- Очекуваме за два месеци да бидат готови ревизиите на постојната ситуација, што ќе биде основа за објавување на меѓународен повик за завршување. Да дадеме три месеци за избор на доставувач и на склучување договор. Ќе работиме со компании со меѓународна репутација и капацитет да ја завршат работата. Сега имаме и одредено искуство со реконструкциите на оперативните блокови во „8 Септември“ и во Клиничкиот центар, кои се најсензитивниот и најскап дел во овој зафат, така што мислам дека можеме да донесеме мудри одлуки за да нема проблеми како што имаше во претходниот период со изведувањето на работите" - изјави Клековски.

Министерот посочи дека финансиската реализација на проектот до сега е на околу 30 отсто и образложи кои делови од изградбата се веќе изведени и кои претставуваат поскап, технички поинтензивен дел.

„- Во новата болница финансискиот дел е на 30 отсто од проектираните износи, меѓутоа завршените работи се во смисла изведени занаетчиски работи и слично бидејќи тоа е поевтиниот, условно да кажам, дел од изведбата, а поскапиот дел се машинскиот, оперативниот блок, и секако новата опрема што треба да ја обезбедиме за болницата. Значи, финансиски изведбата е 30 отсто. Таа е затворена карабина со најголем дел од фасадата затворена и со најголем дел од инсталациите веќе завршени" - вели Клековски.

Како што беше појаснето, останува да се доизгради оперативниот блок и да се внесе опремата. Потоа ќе следи втора фаза во која ќе се срушат стари објекти, ќе се обноват и ќе се спојат во една функционална целина.

„- Зборуваме за првата фаза на работата. Втората фаза опфаќа рушење стари објекти, нивна обнова, изградба и спојување во една функционална целина" - истакна Клековски.

Клиничката болница во Штип е единствениот клинички регионален центар во источниот дел на земјата и обезбедува здравствени услуги за речиси 150.000 жители, додека поширокото гравитациско подрачје опфаќа приближно 250.000 жители. Министерството очекува дека со завршувањето ќе се подобрат дијагнозата, третманот и итната помош, ќе се намали потребата од упатување пациенти кон Скопје и ќе се создадат подобри услови за развој и задржување на медицинскиот кадар. Во сите фази е најавен строг надзор и транспарентност од надлежните институции.

Фото: прес-материјал од настанот