ЛДП бара „главните партии“ да вратат четири милиони евра, изборните реформи ја продлабочуваат конфронтацијата

Либерално демократската партија (ЛДП) побара од "главните партии" да им ги вратат на граѓаните средствата што ги добиваат од државниот буџет—вкупно четири милиони евра—обвинувајќи ги дека јавниот простор го претвораат во арена за навреди и меѓусебни пресметки наместо за политики.

„ЛДП бара „главните партии” веднаш да им ги вратат парите на граѓаните, односно сите четири милиони евра што се земаат за финансирање на политичките партии. Граѓаните не можат да врзат крај со крај па уште мора да одвојуваат од својот џеб за „главните партии” да ги користат тие средства за ширење омраза и меѓусебно понижување. Бараме итно враќање на достоинството на политиката“ , велат од Либерално демократската партија.

Финансирањето во центарот на дебатата за Изборниот законик

Прашањето за партиското финансирање се најде во фокусот во време кога треба да почнат разговори за нов Изборен законик, а една од темите е токму начинот на распределба на државните пари за партии.

Во средата се одржа нов обид за разговори, собранието се одржа во Правда, но столчињата на СДСМ останаа празни. Министерот за правда, Шасивари, најави дека ќе се обиде лично да воспостави контакт со претседателот на социјалдемократите, Филипче, за да ги убеди да присуствуваат на наредната средба на работната група.

Премиерот Мицкоски изјави дека гледа начин како да се откочи дијалогот и ги повика СДСМ, Левица и ДУИ да дојдат на состанок со заеднички усогласен предлог кој, според него, владата би можела да го прифати. Тој посочи дека „Левица има свои барања, СДСМ сè уште нема јасно дефиниран став, додека ДУИ има предлог кој, според него, не може да биде прифатен“, но не откри детали, образложувајќи дека разговорите зад затворени врати треба да останат доверливи.

СДСМ ја бојкотира работната група поради несогласувањето со предвидените измени, особено моделот за гласање на дијаспората, како и поради укинувањето на Пржинската влада без консензус. За ВМРО-ДПМНЕ, услов е да се олесни гласањето на дијаспората од претседателските избори 2029 година.

Петар Догов

Фото: прес-материјал од настанот