“Mjaft, ne nuk do të presim viktimën e tetë”: Organizata qytetare kërkojnë mbrojtje

Tre rrjete qytetare kërkuan hetime të menjëhershme për mënyrën se si institucionet veprojnë në rastet e femicideve, ndryshime ligjore dhe sigurimin e fondeve për mbrojtjen e viktimave. Në një letër të hapur, ato propozuan gjithashtu një moratorium për ngjarjet ceremoniale dhe promovuese brenda fushatës së këtij viti „16 ditë aktivizëm kundër dhunës së bazuar në gjini“.

Letra u firmos nga Rrjeti për Mbrojtjen nga Diskriminimi, Platforma për Barazi Gjinore dhe Rrjeti Kombëtar kundër Dhunës ndaj Grave dhe Dhunës Familjare. Organizatat theksuan se janë regjistruar shtatë femicide, dhe viktima më e fundit ishte një vajzë 17-vjeçare nga Bogdanci.

Sipas firmëtareve, institucionet nuk siguruan mbrojtje edhe në raste kur viktimat kishin denoncuar më parë dhunën dhe kishin kërkuar ndihmë. „Ne nuk na duhet një shtet që vajton gratë e vrara. Na duhet një shtet që do t'i mbrojë ndërsa janë gjallë“, shkruajnë ato.

Kërkesat kryesore

Grupet renditën masat urgjente që u kërkohen Qeverisë, Kuvendit dhe institucioneve përgjegjëse:

• Një hetim i pavarur dhe i thellë për veprimet institucionale në të gjitha rastet e femicideve, veçanërisht kur dhuna ishte raportuar më parë, me përcaktimin e përgjegjësisë individuale dhe institucionale.
• Ndryshime të menjëhershme ligjore për mbrojtje nga dhuna, përfshirë rregullimin e masave emergjente dhe përdorimin e paisjeve elektronike për monitorim.
• Përsëritja e koncepteve gjini dhe barazi gjinore në ligjet arsimore, udhëzimet për mbrojtje nga dhuna dhe programet e edukimit seksual.
• Mirrja e përfundimeve nga seanca e mbikëqyrjes parlamentare për dhunën me bazë gjinore, me afate konkrete për institucionet.
• Sigurimi i buxhetit dhe stafit të specializuar për policinë, shërbimet sociale, prokuroritë, gjykatat dhe institucionet shëndetësore.
• Financim publik i qëndrueshëm për shërbimet e specializuara: strehimore, intervenim krizash, ndihmë psikososiale dhe ligjore, shërbime për fëmijë dhe programe për autorët e dhunës.
• Një plan publik dhe i detyrueshëm me përgjegjësi të qarta, afate, buxhet dhe rezultate të matshme, për të cilin Qeveria dhe Kuvendi do të raportojnë rregullisht.

Organizatave i kërkojnë që fondet për ngjarje ceremoniale dhe fushata simbolike të ridestinohen drejt mbrojtjes së menjëhershme të grave. Ato u bënë thirrje Kombeve të Bashkuara, Bashkimit Evropian, OSBE-së, ambasadave dhe donatorëve që të përdorin autoritetin e tyre politik për të kërkuar llogaridhënie nga institucionet.

Si propozim për ndryshimin e fokusit, firmëtaret sugjerojnë që „16 ditët e aktivizmit“ të këtij viti të bëhen „16 ditë përgjegjësie institucionale“, gjatë të cilave do të miratohen ligje, do të sigurohen buxhete dhe do të merren angazhime konkrete. „Ngjyra portokalli nuk shpëton jetë. Institucionet duhet të shpëtojnë jetë“, thuhet në letër.

"Mjaft. Ne nuk do të presim viktimën e tetë", përfunduan Rrjeti për Mbrojtjen nga Diskriminimi, Platforma për Barazi Gjinore dhe Rrjeti Kombëtar kundër Dhunës ndaj Grave dhe Dhunës Familjare.

Foto: material shtypi nga ngjarja