Слабоста на институциите и немањето шелтер центри во околината на Богданци

Убиството на 17-годишната Билјана Кириќ во Богданци повторно го отвори прашањето дали институциите навистина ја препознаваат опасноста по животот на жената или насилството го третираат како уште еден пријавен инцидент.

Процедури, формулари и недостаток на услуги

Во вечерната дебата судијката Габриела Гајдова, адвокатката Неда Чаловска и претставничката на Националната мрежа против насилство врз жените, Елена Димушевска, ги лоцираа слабите точки во пракса и во локалната инфраструктура за заштита на жртвите.

Адвокатката Неда Чаловска посочи дека „по пријавата Билјана 20 дена останува без никаква заштита иако Законот за правда на деца, вели, кога е дете жртва постапката е итна, а јавниот обвинител одлучува да оди по редовна постапка и нема ниту одлука за безбедност, според Законот за кривична постапка, затоа што мерката којашто е изречена во граѓански суд не исклучува и обвинителот на побара мерка за безбедност или друга мерка за определување на присуство, како што е да речеме куќниот притвор. Тука имаме особено ранлива жртва, која е малолетна, која две недели во прекинала своето образование, затоа што се плашела и две недели не одела во училиште,“ и го нагласи симболичниот детал дека била облечена во блуза со имињата на жени – жртви на насилство како Ајнет, Сузана, Росица, Ивана и Катја, Танкица, Рамајана…

Судијката Габриела Гајдова рече дека "има впечаток дека формално се исполнува таа задача и низ обуките кои што ги држиме гледам дека процената на ризик се прави врз основа на формулари кои што ги имаат и МВР и Центарот за социјална работа." Таа додаде: „Јас сакам да истакнам дека процената на ризик е многу повеќе од чек листа и формално поставување на прашања и добивање на одговори.”

Елена Димушевска ја потенцираше долготрајноста на проблемот: „ова не е прв случај каде што зборуваме за проценката на ризик, туку прашање кое се отвара со години наназад. Таа истакна дека и да имало предлог ова девојче да биде сместено во шелтер или да и се обезбеди психолошка поддршка, таа тоа не можела да го добие бидејќи во околината на Богданци не постои ниту една бесплатна услуга освен Центарот за социјални грижи.”

Во суштина, учесниците укажуваат на комбинација од формализам во проценките на ризик, нееднакво користење на овластувањата на обвинителството и очигледен недостаток на локални сервисни можности — пред сè шелтер-центри — кои оставаат ранливи жени и девојки без опции за итна заштита. Тие побараа забрзани, чувствителни на детето процедури и проширување на бесплатните психосоцијални и прифатни услуги во помалите општини.

Фото: прес-материјал од настанот