Двајца полицајци пријавени за кражба и полово вознемирување во Прифатниот центар за странци

Кривични пријави за двајца полициски службеници од Прифатниот центар за странци при Регионалниот центар за гранични работи Север поднесе Одделот за внатрешна контрола при МВР.

Какви пријави се поднесени

Полицајката Б.Д. се сомничи за тешка кражба. Според пријавата, на 28 септември годинава, при преглед на чантата на привремено задржано женско лице, таа пронашла и одзела еден златен и еден сребрен прстен, како и 3.000 денари, кои, како што е наведено, ѝ припаѓале на мајката на задржаната жена.

Вториот пријавен, Б.М., кој бил раководител на смена, се товари за полово вознемирување. Според службените документи, на 30 септември тој влегол во собата каде била сместена жената и, преку вербални и физички постапки, како и преку електронски средства за комуникација, изразувал сексуална страст и преземал дејствија што потсетуваат на сексуален однос.

Од МВР посочуваат дека со тоа ѝ го повредил достоинството на жената и предизвикал непријатност, навреденост, понижување и страв, при што ги искористил својата подредена положба кон задржаното лице.

Покрај кривичните пријави, против двајцата полицајци ќе биде поднесен предлог за поведување дисциплинска постапка и нивно отстранување од работните места — односно суспензија до завршување на дисциплинската постапка.

Фото: прес-материјал од настанот