Двајца полициски службеници пред кривична пријава и суспензија поради претерана сила врз приведено лице

Одделот за внатрешна контрола, криминалистички истраги и професионални стандарди при Министерството за внатрешни работи поднесе кривична пријава до ОЈО ГОКК – Специјализирано одделение за гонење на кривични дела сторени од лица со полициски овластувања и припадници на затворската полиција, против двајца полициски службеници, означени како Т.М. и И.Ш.

Тие се пријавени за кривичното дело „малтретирање во вршење на службата“ по член 143 од Кривичниот законик.

Во пријавата е наведено дека првопријавениот Т.М., полициски службеник во Полициската станица Струга, и второпријавениот И.Ш., кој е наведуван како „главен полицаец за вршење увиди на сообраќајни незгоди“, на 14.05.2026 во просториите на ПС Струга употребиле прекумерна физичка сила при спроведување на лице кое претходно било лишено од слобода.

Насилството и предложените дисциплински мерки

Според пријавата, и покрај тоа што лицето било врзано со лисици, двајцата полициски службеници физички го нападнале и го удирале со раце и нозе.

Покрај кривичната пријава, Одделот за внатрешна контрола ќе поднесе предлог за поведување дисциплинска постапка против двајцата. Како задолжителни мерки ќе бидат одземени службеното оружје и муницијата, а ќе биде изречена и суспензија од работното место до завршување на дисциплинската постапка.

Прашањето сега е пред Специјализираното одделение на Јавното обвинителство (ГОКК), кое треба да одлучи дали ќе постапува по пријавата за делото предвидено во член 143 од Кривичниот законик.

Фото: прес-материјал од настанот