Е‑трговијата во Македонија: кешот доминира, дигиталните вештини само 31%

Ниско ниво на дигитални вештини, доминација на готовинските плаќања, сивата економија и недоволната доверба на потрошувачите се главните пречки за развојот на е‑трговијата во Македонија, беше истакнато пред почетокот на 9. издание на Регионалната конференција за е‑трговија во Скопје.

Нина Ангеловска, претседателка на Асоцијацијата за е‑трговија, посочи дека додека светот зборува за ВИ‑агенти, хиперперсонализација и автоматизирана трговија, регионот уште се соочува со основни предизвици. Таа го наведе падот на дигиталните вештини кај населението — само 31 процент има основни дигитални вештини, во споредба со 64 проценти во Европската Унија; пак, напредните дигитални вештини се само 7 проценти, најниско во регионот.

Ангеловска истакна и позитивен податок: податоците на Асоцијацијата покажуваат дека над 50 проценти од онлајн трансакциите сè уште завршуваат кај домашни трговци. Од друга страна, според податоците на Народната банка за првото полугодие, вкупната вредност на електронските трансакции бележи раст од 14 проценти во однос на минатата година, но со ширењето на глобалните платформи расте и одливот — бројот и вредноста на трансакциите со домашни картички кон странство.

Конференцијата е деветто издание и собра околу 900 учесници од 12 држави, меѓу кои има претставници на големи глобални компании како „Гугл“, „Линкдин“, „Тесла“ и „Амазон“.

Поддршка од државата и пилот‑модели

Министерот за дигитална трансформација, Стефан Андоновски, изјави дека државата има солидна основа за развој: 97 проценти од малите и средните претпријатија имаат пристап до интернет, а купувачите сè повеќе се присутни онлајн. Министерството моментално поддржува два европски дигитални иновациски хаба за поддршка на бизнисите.

Првиот хаб, кој функционира веќе една и пол година во соработка со ФЕИТ, досега помогнал на над 60 компании преку обуки и изработка на патокази за дигитална трансформација. Вториот е проект преку „Дигитмак“ насочен кон дигитализација на трговците. Како успешен пилот‑проект Андоновски ја посочи иницијативата во Битола, реализирана со локалните комори, бизнисите, банките и „Виза“, каде што целосно се дигитализирани над 90 мали и средни претпријатија; министерот најави дека овој модел наскоро ќе се преслика и во други градови.

Фото: прес-материјал од настанот