Филипче: Хиперхлорирањето во Гостивар носи ризик од малигни болести – Мицкоски возврати со извештаи од 2019

На денешната седница за пратенички прашања во Собранието лидерот на СДСМ и пратеник Венко Филипче остро ја критикуваше Владата за начинот на справување со квалитетот на водата и обвини дека во Гостивар неписмени луѓе со хиперхлорирањето, без претходно да ги отстранат органските соединенија, создале ризик од малигни заболувања. Премиерот Христијан Мицкоски возврати со печатени извештаи од 2019 година и рече дека проблемите со вода постоеле и во минатото.

Во говорот пред пратениците Филипче рече: „Водата е загадена во пола држава: во Гостивар, во Валандово, во Скопје, во повеќе општини, а немате одговор на многу прашања. Беше загадена водата во болницата во Лешок, внимавајте! Чија е одговорноста, кој правел контрола, зошто не се јавувале и пријавувале соодветно резултатите? Зошто не ги објавувате резултатите од водата во Гостивар? Зошто имате контрадикторни изјави, вие едно, министерот за здравство друго, дека наводно ќе била добра за пиење, а потоа ќе била само технички исправна водата? Луѓето се збунети, не знаат што да прават и не знаат кому да веруваат“.

Тој нагласи дека не е работа на лица без соодветна експертиза да одлучуваат за трансформацијата на системот за вода: „Го пуштате министерот за внатрешни работи Панче Тошковски да зборува за чистење на водата, за хлорирање и хиперхлорирање, а човекот нема капацитет, не знае за тоа, не му е тоа сфера на експертиза. Внимавајте, хиперхлорирање на водата! Носи зголемен ризик од малигни болести. Не си играјте играчки. Дајте некој што знае и што ја разбира работата и кој има експертиза да се занимава со тоа. Потребно е прво да се отстранат органските соединенија, а после да се прави хлорирање на водата“.

Филипче го повика и вниманието на јавноста кон инцидентот од 24 јули кога во реката Лепенец кај изворот Рашче во Скопје се појави бела пена, и посочи дека јавноста сè уште не добила задоволителни одговори иако во близина има бунари кои влијаат на водоснабдувањето на главниот град.

Прекини и обвиненија за пошироки прашања

Седницата беше нарушена повеќе пати: пратеничката Даути не сакаше да се тргне од говорницата откако премиерот не ѝ одговори, седницата ја прекина Гаши, а дебатата беше блокирана повторно. Филипче, меѓутоа, го прошири својот говор и на животниот стандард и на спорниот заем од една милијарда евра за кој, рече, унгарската влада води истрага.

Тој изјави: „Паѓаат во вода приказните за стандардот на граѓаните. Секој ден ви е полна устата дека четврти сме биле во Европа, трети, сега сме први, ама луѓето знаат како живеат. Тие живеат на работ на егзистенцијата. Евростат го потврди тоа: последни сме во Европа по стандардот и по примањата, најниски, на дното“. За влијанието врз правосудството и корупцијата тој порача: „Последниот извештај на Европскиот парламент, еден од најлошите досега во оваа смисла, покажува лошо справување со корупцијата, директно влијание на власта врз независното судство. И вие немате никаква реакција на тоа. Напротив, продолжувате со партизација на судовите“.

Мицкоски, наместо да одговори кој премиер е „крив“, излезе на говорницата и покажа фотографии и извештаи за неисправна вода од извештаите на Центарот за јавно здравје кои, според него, се од периодот кога Филипче бил министер за здравство. Премиерот ги прочита наводите од документи за Прилеп, Крушево и Македонски Брод за февруари и март 2019 и изрече: „Има луѓе од вашата пратеничка група од Прилеп. Извештај од Центарот за јавно здравје во Прилеп од 1 февруари 2019 до 28 февруари 2019 и се однесува за градовите Прилеп, Крушево и Македонски Брод. Самиот извештај вели дека има неисправност на водата поради тоа што има бактериолошка неисправност и физичко-хемиска неисправност на примероците. Преземено, ништо. Следен извештај 1 март 2019 до 31 март 2019, повторно за истите градови, и повторно преземено ништо. Можам да ви редам многу вакви извештаи. Овде има цел сноп за Гостивар и за околината. Вие сте министер во тој период. Не само што ви гореа модуларни болници, туку како доктор вие не се држевте до заклетвата. Вие дозволувавте луѓето да конзумираат вода која во најмала рака кажано, претставувала ризик за здравјето на тие кои што ја конзумирале“.

Премиерот повика Обвинителството да ги провери тие стари извештаи. Филипче не успеа да ја добие последната реч поради повторното блокирање на седницата и нејасната состојба на расправањето по прашањата поврзани со квалитетот на водата.

Фото: СДК.МК)