Фон дер Лајен започнува тридневна турнеја низ Западен Балкан

Претседателката на Европската комисија, Урсула фон дер Лајен, започнува тридневна турнеја низ Западен Балкан и денеска пристигнува во Албанија, првата од неколкуте станици што вклучуваат посети и во Косово, Црна Гора и Северна Македонија. Србија и Босна и Херцеговина не се дел од оваа рунда на посети.

Во Тирана, фон дер Лајен ќе има разговори со претседателот Бајрам Бегај и со премиерот Еди Рама и ќе ги посети проектите финансирани со средства на ЕУ; конкретните проекти сè уште не се објавени. Главната тема на состаноците ќе биде европската интеграција на Албанија и следните чекори во преговарачкиот процес.

План за раст и пристап до средства

Очекувањата се дека ќе се разговара и за постепеното вклучување на земјите од Западен Балкан во единствениот европски пазар и за спроведувањето на Планот за раст за регионот. За периодот 2024–2027 Планот има вкупен буџет од 6 милијарди евра, наменет за забрзување на економското приближување кон ЕУ.

За Албанија се предвидени вкупно 922,1 милион евра во форма на грантови и поволни заеми. До мај 2026 година, земјата треба да добие 212,8 милиони евра поврзани со напредок во реформската агенда и инфраструктурни проекти. Пристапот до средствата е условен со спроведување на договорените реформи.

Посетата доаѓа во период кога Тирана бележи напредок во преговорите: Албанија ги отвори сите 33 преговарачки поглавја и во јули привремено ги затвори првите три — за наука и истражување, образование и култура и за надворешни односи. Ова е шестата последователна годишна турнеја на Урсула фон дер Лајен низ Западен Балкан.

Мицкоски негира дека нема да добиеме патоказ

Фото: прес-материјал од настанот