Фондацијата „Трајче Мукаетов“ донира 2,2 милиони денари на клиниката „Козле“

Под покровителство на Фондацијата „Трајче Мукаетов“ беше донирано 2,2 милиони денари на Универзитетската клиника за респираторни заболувања кај децата „Козле“ по завршувањето на дванаесетиот хуманитарен пикник организиран за вработените на „Алкалоид“.

Средствата, собрани на настанот што го организира Фондацијата, ќе бидат наменети за опрема на бронхолошкиот кабинет и за поддршка на тимот што работи бронхоскопии на деца, соопштија од клиниката.

Нова опрема за единствениот бронхолошки кабинет за деца

„Оваа година се одлучивме она што е активност на нашите вработени, каде што покрај делот на професионална работа, тука се да покажат дека во нив има човечност, дека има солидарност и дека помагаме онаму кадешто е потребно да помагаме. Оваа година одлучивме да им помогнеме на најмалите и на професионалците кои водат грижа за најмалите, затоа што тоа е дел од нашето мото, нашата мисија, а тоа е „Здравјето пред сѐ“. Ние пред 15 години започнавме со организирање на овие хуманитарни пикници. За овие 15 години се собрани 14 милиони денари кои беа донирани на разни организации, здруженија кои имаа потреба од тие средства. Оваа година собравме 2,2 милиони денари и се одлучивме да ги донираме на Клиничката болница за респираторни болести кај децата„Козле“,“ изјави Живко Мукаетов, генерален директор и претседател на Управниот одбор на „Алкалоид“.

Проф. д‑р Катерина Бошковска, директорка на Универзитетската клиника за респираторни заболувања кај децата „Козле“, рече дека со набавката ќе се подигнат стандардите на бронхоскопската служба.

„Со оваа опрема којашто ќе биде најсофистицирана за бронхолошкиот кабинет во нашата клиника која е единствена која има бронхолошки кабинет и бронхоскопска екипа, каде што се изведуваат бронхоскопии кај децата од најмала возраст. А тоа се дијагностички за подетална дијагноза на респираторните болести, итни бронхоскопии, терапевтски кога се работи за инхалирани туѓи тела коишто не се ретки во детската возраст и се една драматична и тешка состојба. Овој најнов бронхолошки столб со видеофибер бронхоскоп ќе ни ги подигне критериумите и полесно ќе работиме, целата наша бронхоскопска екипа во која работат врвни професионалци, орлспецијалисти, педијатри,“ изјави проф. д‑р Катерина Бошковска.

Организаторите потенцираа дека пикникот е главната годишна акција на Фондацијата „Трајче Мукаетов“ и на вработените во „Алкалоид“, и дека во текот на последните 15 години преку оваа иницијатива се собрале вкупно 14 милиони денари донирани до институции и здруженија со потреба.

Фото: прес-материјал од настанот