Гаши ја осуди злоупотребата на процедуралните забелешки во Собранието

Претседателот на Собранието, Африм Гаши, се осврна на случувањата на денешната седница посветена на пратенички прашања, поради која пратениците од опозициските албански партии ја блокираа работата. Блокадата уследи откако беше истакнато дека премиерот Христијан Мицкоски не ѝ дал писмен одговор на Илире Даути од Албанската лига на прашање од претходната седница, иако според Деловникот рокот за тоа е 20 дена.

Гаши рече дека честите координации и паузи за време на денот за пратенички прашања не се вообичаена пракса и предупреди дека процедуралните обраќања сè почесто се користат како политички блокади, наместо како заштита на процедурата.

Деловничката намера и злоупотребата

Тој повика деловничкиот механизам за процедурално обраќање да се користи токму во намерата во која е предвиден — координаторите и пратениците да укажуваат доколку сметаат дека е прекршен Деловникот, а не да ја користат оваа можност за политичко блокирање.

„За жал, тој механизам веќе станува политички инструмент и се злоупотребува. Ќе треба да најдеме начин да го заокружиме во смислата во која е содржана во Деловникот – координаторите да го користат секогаш кога сакаат да укажат на процедура, а не за искажување политички ставови или за блокирање на седниците“, порача Гаши.

Тој посочи дека денот за пратенички прашања е првенствено наменет за опозицијата, која, според односот два спрема еден, има најголем простор да поставува прашања и да ја држи Владата одговорна.

Одговарајќи на наводите дека одредени акти на албански јазик немале негов потпис, Гаши тоа го демантираше: „Не, спротивно е тоа. Во Собранието албанскиот јазик се почитува максимално, точно онака како што е предвидено со законот“, заклучи претседателот на Собранието.

Денешната седница заврши предвреме по неколку прекини. Координаторот на пратеничката група на движењето ЗНАМ, Бобан Карапејовски, побара нова едночасовна пауза поради тоа што, како што рече, правото на процедурална забелешка во текот на денот било „апсолутно злоупотребено“, што довело до „непотребно кревање на тензиите и политизирање на целата работа во Парламентот“. Потпретседателката на Собранието, Весна Бендевска, констатираше дека паузата ќе го надмине редовното работно време (до 18 часот) и официјално ја затвори седницата. Илире Даути остана на говорница, инсистирајќи дека нема да се откаже додека Мицкоски не ѝ одговори писмено, со што практично беше блокиран делот за пратенички прашања.

Фото: Собрание