Герила-акција во Скопје: споредба меѓу студентскиот оброк од 140 денари и собраниското мени

Герила-акцијата организирана на скверот пред ТЦ „Буњаковец“ во Скопје постави две маси за да ја илустрира разликата меѓу храната што студентите можат да ја купат со субвенционираниот оброк од 140 денари и понудата во собраниското бифе.

На едната маса беше изложен „студентскиот“ оброк: суво парче леб, конзерва туна, кромид, пиперка и шише сок од половина литар. До чинијата стоеше испечатено мени со пример што може да се купи до плафонот од 140 денари — бурек со сирење и јогурт (120 денари), павлака и половина леб (90 денари), чија‑пудинг (140 денари) и грав без месо (140 денари).

Сатирични менија и јавна реакција

На втората маса, како и на фотографиите што беа објавени, стоеше декорирано парче бифтек и празна чаша за вино. Во менито за собраниското бифе беа наведени омлет со сланина (85 денари), тост со свински врат и кашкавал (120 денари), пилешко печење (115 денари) и плескавица со кашкавал (210 денари). И двете листи јасно беа означени како сатирични.

На Инстаграм, групата која ја изведе акцијата објави со кратка порака: „Општествени контрасти“. Претставникот на Форумот за образовни промени, Бленди Ходаи, ги сподели фотографиите и постави прашање: „До кога за едните луксуз на државна сметка, а за другите борба за опстанок?“

Пред герила-акцијата, Форумот за образовни промени соопшти дека поднел тужба против Министерството за образование и наука пред Управниот суд. Од организацијата тврдат дека МОН во изминатите три години не ја спровело законската обврска да ја усогласи висината на субвенцијата со годишната стапка на инфлација, предвидена во членот 2.1 од Законот за субвенциониран студентски оброк.

При поднесувањето на тужбата, Ходаи побара Владата и Собранието да ги отворат вратите за студентите, за и тие да можат да јадат бифтек по цена од 160 денари како пратениците и министрите. По ова следеше и најавата од Мицкоски за нови поволности за студентите.

Фото: прес-материјал од настанот