Германската Влада доделува 3,5 милиони евра за Регионалниот фонд за предизвици

Бранко Азески, в.д. претседател на Коморскиот Инвестициски Форум (КИФ) на шесте земји од Западен Балкан, доби известување преку Сојузното министерство за економска соработка (одделение за Југоисточна Европа) дека Владата на Сојузна Република Германија ќе го поддржи Регионалниот фонд за предизвици со дополнителни 3,5 милиони евра и ја задолжува Германската банка за развој (KfW) за спроведување на активноста, која ќе биде финализирана со договор за финансирање.

Оваа донација ја продолжува долгорочната соработка на Германија со Фондот: во текот на изминатите пет години, преку четири отворени регионални повици, Владата на СР Германија поддржа распределување вкупно 83,4 милиони евра грантови за 126 проекти во регионот.

Како беа распределени претходните повици

Прв повик — 14,38 милиони евра доделени гранта за 37 конзорциуми; Втор повик — 12,2 милиони евра доделени гранта за 27 конзорциуми; Трет повик — 7,29 милиони евра доделени гранта за 16 конзорциуми; Четврти повик — 12,6 милиони евра доделени гранта за 38 конзорциуми.

Процесот на креирање и имплементација на проектите го води Коморскиот инвестициски форум, при што коморите заземаат клучна улога во моделот на дуално образование: тие ги поврзуваат работодавачите — кои ги дефинираат потребите за кадар — и образовните институции, кои треба да обезбедат стручно и квалитетно оспособување.

Регионалниот фонд за предизвици е основан по иницијатива на Министерството за економска соработка и развој на Сојузна Република Германија (BMZ), финансиран преку Германската банка за развој (KfW), и има за цел да ја зголеми конкурентноста на претпријатијата во шесте економии на Западен Балкан преку финансирање инвестиции во опрема и инфраструктура за проекти за дуално и стручно образование. Грантовите се доделуваат преку конкурентен регионален предизвик.

Во рамки на програмата, Северна Македонија преку сите четири грант-рундови обезбеди поддршка за 17 конзорциуми: 12 стручни училишта, 5 факултети и 88 компании/организации, во вкупен износ од 7,63 милиони евра.

Со новиот прилог од 3,5 милиони евра од Германија, KfW ќе ја спроведува активноста, а следниот чекор ќе биде формализирање преку договор за финансирање кој ќе ги утврди деталите за распределба и избор на проекти.

Фото: Grand Canyon National Park / Wikimedia Commons (Public domain)