Ѓорѓиевски најавува проширување на капацитетите за третман на бездомни кучиња

Градоначалникот на Скопје, Орце Ѓорѓиевски, најави дека Градот обезбедил средства за проширување на капацитетите за третман и згрижување на бездомните кучиња, но дека реализацијата најверојатно ќе се случи на нова локација бидејќи постојниот објект на ЈП „Лајка“ не може да се доградува поради нерешени урбанистички ограничувања.

Ѓорѓиевски посочи дека се очекува процесот да започне до крајот на годината и дека службите на Градот веќе бараат соодветна замена за сегашната локација.

Урбанизам ја блокира можноста за доградба

„Постоечката локација е изградена на диво во минатото и деталниот и генералниот урбанистички план не дозволуваат да го прошириме капацитетот таму. Бараме друга опција и верувам дека до крајот на годината ќе започнеме со процес на доизградба на капацитети, можеби на друга локација што моментално ја утврдуваме“, изјави Орце Ѓорѓиевски.

Тој појасни дека иако финансиските средства се обезбедени, административните и урбанистички ограничувања не дозволуваат изградба или доградба на постоечкиот објект додека тие проблеми не бидат решени.

Градоначалникот оцени дека е видлив напредок во справувањето со прашањето на бездомните кучиња во главниот град, но дека проблемот сѐ уште не е целосно решен. Градските служби ќе продолжат со барање решение кое ќе овозможи подобри услови за згрижување и третман и поефикасно справување со долгогодишниот проблем.

Фото: прес-материјал од настанот