Скопје распиша тендер за елка висока 13 метри и новогодишни светлечки фигури

Градот Скопје распиша јавен повик за поставување на новогодишното украсување, во кој е предвидено да се постави елка висока 13 метри и повеќе светлечки фигури на градскиот плоштад.

Условот од јавниот повик е украсувањето да биде завршено на 15 декември, а вредноста е проценета на околу 70 илјади евра. За изборот на изведувач е распишан тендер.

Што бара тендерот

Во огласот е опишан декоративен светлосен мотив во облик на елен, висок околу четири метри, со декоративен елемент во форма на шеќерна трска на роговите, како и комбинација од топло бело и ладно бело ЛЕД-осветлување со динамични светлосни ефекти.

Предвидена е и светлосна фигура во форма на подарок, висока над шест метри, два 2Д-портали и 3Д-санка со подароци, висока околу два, а широка четири метри, со можност за влез во санката и фотографирање.

Дополнително, ќе бидат поставени два 3Д-балона високи по 3,5 метри, фигура на Дедо Мраз, стотина букети со ЛЕД-осветлување, како и светкав зелен новогодишен венец за фотографии. Скопје ќе биде украсено и со светилки на канделабрите и со светлосни мразулци.

За разлика од минатата година кога во тендерот беа точно наведени локациите, овојпат јавниот повик не ги конкретизира местата за поставување; тие ќе бидат утврдени во налогот за работа што ќе го добие избраниот фирма. Минатата година украсувањето го реализираше фирмата „Линк медиа плус“, а вредноста на договорот беше иста како годинава.

Фото: прес-материјал од настанот