Минчев: Нацрт‑закон за државна управа ќе донесе појасни надлежности и поголема отчетност

Министерот за јавна администрација Горан Минчев на јавна стручна дискусија во Скопје кажа дека Нацрт‑законот за организација и работа на органите на државната управа треба да постави појасни правила за организацијата на институциите, прецизна поделба на надлежностите и посилна одговорност во полза на граѓаните и стопанството.

Отворајќи ја дебатата што се одржува денеска во Скопје, Минчев оцени дека досегашниот модел довел до фрагментација на институциите, преклопување на надлежностите и недостаток на отчетност, што како последица имало намалување на квалитетот на услугите за граѓаните и бизнисот.

Не само реорганизација, туку промена на начинот на работа

Според министерот, целта на новата законска рамка не е само организациска реформа, туку создавање појасен, предвидлив и одржлив систем на функционирање, усогласен со принципите на добро владеење и европските стандарди.

Минчев предупреди дека досегашните пракси создадоа паралелни структури кои трошеле народни средства, а не одговарале пред никого. Тој додаде дека нацрт‑законот треба да ги отстрани тие преклопувања, да разјасни кој е надлежен за што и да ја зголеми одговорноста во секојдневното управување.

"Повеќе од две децении, јавната администрација беше свесно фрагментирана, распарчувана и претворана во мозаик од институционални феуди. Секоја политичка криза, секој партиски договор во минатото, се плаќаше со создавање нови агенции, паралелни дирекции и непотребни комисии кои постоеа сами за себе, трошеа народни пари, а не одговараа пред никого. Граѓаните и стопанството со години беа туркани во лавиринти од преклопени надлежности, каде што секој орган креваше раменици, а никој не ја преземаше одговорноста за лошите резултати" - рече Минчев.

Фото: прес-материјал од настанот