Shkupi vendos kamera për të kapur ndotësit dhe lançon aplikacion për raportime

Bashkia e Shkupit ka shpallur masat e reja për të parandaluar hedhjen e paligjshme të mbeturinave dhe shkatërrimin e pajisjeve urbane, që përfshijnë vendosjen e monitorimit me video në pikëkritike dhe një aplikacion për raportime të qytetarëve.

Rrjeti me kamera dhe platforma për raportime

Zyrtarët komunalë thanë se parashikohet vendosja e më shumë se 200 kamerave në lokacione kritike në Shkup, por përdorimi i regjistrimeve do të kërkojë miratim nga Agjencia për Mbrojtjen e të Dhënave Personale. Bashkia i paraqiti kamerat si mjet për të zbuluar shkelësit dhe për të parandaluar krijimin e depozitave të jashtligjshme.

"Ne do të vendosim më shumë se 200 kamera në lokacionet kritike në të gjithë qytetin. Kjo deri tani nuk është bërë. Këtu do të përfshihen pika kritike si vendet ku krijohen depot, në parket që janë konstantisht të sulmuara," tha Orce Gjorgjievski, kryetar i Qytetit të Shkupit.

Paralelisht u prezantua platforma Eco Skopje, e hartuar nga 30 aktivistë të rinj. Përmes saj, banorët do të mund të raportojnë në mënyrë anonime kontejnerë të mbushur, deponi të paligjshme dhe erëra të pakëndshme, ndërsa raportet do të dërgohen drejt shërbimeve kompetente.

"Në vetë aplikacionin ju do të mund të raportoni menjëherë dhe të jeni të sigurt që raporti do të arrijë në vendin e duhur. Nuk do të ketë nevojë të ridërgohet apo të zvarritet e tërë ajo procedurë. Shërbimet menjëherë do të kenë pamje dhe do të jenë në gjendje të veprojnë," tha Andrej Bozhinovski duke folur për platformën Eco Skopje.

Zyrtarët vërejnë se kamerat e mbikëqyrjes përdoren tashmë në vende të tjera për të zbuluar hedhjet e paligjshme të mbeturinave — u përmendën India dhe Irlanda — ndërsa në Serbi dhe Mal të Zi policia komunale kryen inspektime në terren dhe zbatojnë masat e rregullores komunale.

Kryetari po ashtu njoftoi planet për riorganizimin e deponisë Drisla, me qëllim që ajo të transformohet në një qendër moderne për menaxhimin dhe riciklimin e mbeturinave.

Raportoi: Tamara Markovska

Foto: material shtypi nga ngjarja