Парното може да поскапи повторно — четири компании бараат корекција

Четири компании побараа ревизија на цената на парното пред крајот на годината, што може да значи трето зголемување за 2026 година, потврдуваат Регулаторната комисија за енергетика и ЕСМ.

Од РКЕ велат дека сите четири компании — ЕСМ Производство, снабдување, дистрибуција и фирмата Енерџи Еколонг – поранешна Скопје Север — поднеле барања за ново зголемување на цената. "Истите се однесуваат за ревидирање на цената за топлинската енергија што е донесена во јули, а е на сила од 1 август 2026 година. Како причини за доставување на новите барања компаниите ја наведуваат високата цена на природниот гас", соопштија од Регулаторната комисија за енергетика.

ЕСМ: цената на гасот расте на берзите

Пресметката на ЕСМ покажува дека цената на гасот во октомври е зголемена за околу 60 отсто, во однос на одлуката за цената донесена во јули. "Висината на евентуалната промена на цената зависи од повеќе фактори, при што клучно влијание има цената на гасот на берзите. Актуелните прогнози укажуваат на раст на цената на природниот гас, пред сè како резултат на тековните геополитички случувања на Блискиот Исток кои предизвикуваат нестабилност на глобалните енергетски пазари", соопштија од ЕСМ.

Ако регулаторот ја прифати ревизијата, тоа ќе биде трето поскапување годинава — во јануари цената се зголеми за 5 отсто, а на крајот на јули регулаторната одлука донесе пораст од скоро 6 отсто.

Останува да се види дали домаќинствата ќе се соочат со уште едно поскапување во екот на грејната сезона. Во меѓувреме, цената на гасот на берзите е речиси 90 евра за мегават-час, највисоко ниво во однос на декември 2022 година, кога беше претходната енергетска криза.

Автор: Ирена Чачкова

Фото: прес-материјал од настанот