Грција подготвува ограничување на плаќање во готово при достава на пратки

Грција подготвува нови правила кои ќе го ограничат плаќањето во готово при достава на пратки преку курирски служби. Во предлог‑законот на Министерството за национална економија и финансии се предвидува купувачите да користат електронски начини на плаќање, без оглед на вредноста на нарачката.

Какви плаќања и какви казни

Во предлогот се посочува дека меѓу 30 и 40 отсто од доставените производи во земјата сѐ уште се плаќаат во готово. На располагање ќе бидат платежна картичка, банкарски трансфер или електронски паричник, а останува можноста за плаќање при преземање само ако трансакцијата се изврши електронски.

За курирските компании што ќе примаат готовина се предвидуваат казни во двојна висина од наплатениот износ. На пример, доколку курир наплати 50 евра во готово, компанијата би можела да добие казна од 100 евра.

Предвидени се и исклучоци за одредени категории граѓани — меѓу кои би можеле да бидат постарите лица и лицата со попреченост. Точниот опфат на исклучоците ќе биде утврден со министерска одлука.

Предлог‑законот е во фаза на јавна расправа, а властите планираат да го достават до парламентот на почетокот на ноември. Новите правила се очекува да стапат во сила по неговото усвојување.

Со предложените измени, владата има за цел да ја зголеми употребата на електронските плаќања и да ја подобри контролата врз финансиските трансакции во онлајн трговијата.

Фото: прес-материјал од настанот