Холандската централна банка префрли 86 тони злато во Лондон

Холандската централна банка префрли 86 тони злато од САД и Канада во трезорите во Лондон, со образложение дека така резервите ќе бидат полесно достапни во случај на сериозна криза, во услови на зголемена геополитичка и економска неизвесност.

Од банката нагласиле дека не очекуваат непосредна економска катастрофа, но сметаат дека е важно физичките резерви да бидат блиску и брзо испорачливи ако пазарите се дестабилизираат. Слични потези беа направени и од други европски држави: Франција врати дел од златните резерви од САД, додека Германија префрли повеќе од 216 тони од Њујорк и Париз.

Зошто Лондон?

Лондон е избран поради неговата улога како еден од најголемите светски центри за трговија со злато. Во трезорите на Банката на Англија се чуваат околу 400.000 златни прачки, чија вредност надминува 200 милијарди фунти, што го прави Лондон логичен избор за складирање резерви што треба да бидат лесно достапни за европските централни банки.

Префрлувањето на физичко злато го прикажуваат како претпазливост за ликвидноста и безбедноста, а не како одговор на некој конкретен, непосреден шок. Со концентрирање на повеќе резерви во Европа или на блиски трговски хабови, централните банки сакаат да ги намалат логистичките и политичките пречки во случај на нарушување на пазарите или синџирите на снабдување.

Овие трансфери се дел од поширок тренд на репатријација и прераспределба на златните резерви во Европа, додека властите преиспитуваат каде и како најдобро да се чуваат и користат националните резерви во време на зголемена меѓународна неизвесност.

Фото: Гети)