Ивчевска Трајковски: Авторитетот како претседател се гради со знаење, интегритет и одговорно постапување
Поранешната олимпијка вели дека федерацијата треба да премине од импровизација кон долгорочно, предвидливо планирање.

Ивана Ивчевска Трајковски, некогашна македонска олимпијка и сега претседателка на Скијачката федерација на Македонија, вели дека нејзин приоритет е федерацијата да се трансформира во предвидлива и професионална институција која созрева таленти, а не само ја администрира секојдневната работа.
Од олимписки патеки до раководна функција
Ивчевска Трајковски, која ја претставуваше Македонија на Зимските олимписки игри во Торино во 2006 година на 17-годишна возраст во слалом и велеслалом, ја доживува претседателската функција како многу поголема од личната спортска биографија. Таа нагласува дека потребни се организациски вештини, визија и одговорно управување со ресурси.
„Ви благодарам за честитките. Функцијата претседателка на Скијачката федерација ја доживувам како предизвик, затоа што таа не се однесува само на управувањето со една спортска организација, туку и на очекувањата на спортистите, тренерите, клубовите и на сите оние кои веруваат дека македонското скијање има потенцијал за развој.“ Таа додава дека, иако симболично има тежина тоа што е жена на чело, „компетентноста, посветеноста и резултатите не познаваат родови граници, а авторитетот не се стекнува со самото преземање на функцијата, туку се гради со знаење, интегритет и одговорно постапување.“
Според неа, најголемите предизвици се системски: непредвидливо финансирање, недостаток на континуитет во подготовките и недоволна координација меѓу Федерацијата и клубовите. Таа појаснува дека скијањето не дозволува многу импровизации бидејќи подготовките зависат од условите на снег, опремата и навременото учество на меѓународни натпревари.
Ивчевска Трајковски истакнува дека личното искуство во спортот е предност, но не и единствен предуслов за успех во раководството: „Сметам дека личното искуство во спортот е значајна предност, но не би го поставила како единствен предуслов за успешно раководење со една федерација.“ Таа додава дека доброто раководење подразбира почитување на експертизата на тренерите и создавање простор таа да дојде до израз.
Во интервјуто таа раскажува дека скијањето ѝ почнало на четири години во Маврово, со први клупски чекори во „Цементарница Усје“, а подоцна во „Работнички“ под водство на Иван Лесевски. Тоа искуство, вели, ја научило дека напредокот доаѓа со дисциплина и долгорочно планирање — принципи што сега се обидува да ги воведе во работата на Федерацијата за да младите спортисти знаат навреме со какви услови ќе располагаат за подготовка и настапи.
Фото: прес-материјал од настанот


