Јаневска ги отфрла обвинувањата дека не се објавени ранг‑листите за прием во студентските домови
Министерката вели дека има објавени лица примени и непримени со образложение, додека Левица бара објава на освоените бодови
Министерката за образование и наука Весна Јаневска ги отфрли обвинувањата од опозициската партија Левица дека Министерството ги крие бодовите и ранг‑листите за прием во студентските домови.
На прашање за овие тврдења, Јаневска изјави: "Жалосно е што во јавноста се шират дезинформации. Апсолутно тврдам, ранг‑листите се објавени на примените, но објавена е и ранг‑листа на непримените со објаснување зошто не се примени".
Барање за објавување на освоените бодови
Министерката објасни дека меѓу одбиените кандидати се студенти кои студираат седма или осма година и оние чии родители имаат енормно високи примања, бидејќи тие не ги исполнуваат условите за прием во домови. Таа додаде дека критериумите за прием се јавно објавени во огласот.
"Како и да е, критериумите се објавени јавно, ги има во огласот", изјави Јаневска.
Во реакцијата на Левица се нагласува дека, покрај списоците на примени студенти, треба јавно да се објават и освоените бодови врз основа на кои е направено рангирањето. Партијата тврди дека необјавувањето на бодовите ја ограничува можноста студентите да проверат како е извршено рангирањето и дали критериумите биле еднакво применети, и ја обвинува Јаневска дека дава изјави кои, според нив, не се поклопуваат со официјалните документи на Министерството.
Фото: Архива
