Камениот мост во Скопје доби ново декоративно и архитектонско осветлување

Камениот мост во центарот на Скопје вчеравечер беше свечено пуштен во употреба со ново декоративно и архитектонско осветлување. Градоначалникот на Град Скопје, Орце Ѓорѓиевски, заедно со градоначалникот на Општина Есенлер, Турција, Мехмет Тевфик Гоксу, го отворија осветлувањето на свечен настан на кој присуствуваа и амбасадорот на Турција, Н.Е. Алпер Акташ, извршниот директор на Халк Банка, Фатих Шахбаз, и почесниот конзул, Ајдован Адемоски.

"Постојат места на кои секогаш им се враќаме, затоа што во нив препознаваме дел од себе. За скопјани, такво место е Камениот мост. Во неговиот камен се врежани векови историја. На него се среќавале генерации, започнувале пријателства и се создавале спомени што траат цел живот. Над Вардар, меѓу двата брега, стои нашата заедничка гордост. Вечерва, таа гордост повторно блеска. Новото осветлување ја истакнува убавината на неговите сводови и му дава посебна величественост во срцето на градот Уште една причина да застанеме, да погледнеме и да си кажеме, колку убаво Скопје имаме. Токму таа убавина сме должни да ја чуваме. Со посветеност, со одговорност и со конкретни дела. Секое обновено обележје е почит кон оние што ни го оставиле и влог за оние што доаѓаат по нас" – изјави Ѓорѓиевски.

Од градските служби велат дека новото осветлување е дизајнирано да ги нагласи сводовите и архитектонските детали на мостот, со цел да го истакне неговиот историски карактер и улогата како визуелен поврзувач меѓу двата брега по зајдисонце.

На настанот присуствуваа претставници од турската дипломатска и бизнис заедница, како и локални функционери. Градските власти најавија дека обновеното осветлување ќе ја зајакне улогата на Камениот мост како место за средби и потсетување, но и како симбол во централниот дел на градот.

Камениот мост, како централен урбан и историски елемент на Скопје, останува дел од јавниот простор во кој се препознаваат генерации и за кој градот вели дека ќе го одржува преку вакви конкретни проекти.

Фото: прес-материјал од настанот