Клековски: Еден сомнителен случај на морбили, нема подобра заштита од вакцинација

Министерот за здравство Сашо Клековски денеска соопшти дека во државата е регистриран еден сомнителен случај на морбили, за кој се уште се чекаат резултатите од лабораториските испитувања.

Сомнителниот случај е дете на возраст над една година. Досега во земјата има пет потврдени случаи со морбили, од кои четири се македонски државјани, а еден е странец. Сите случаи се обработуваат темелно епидемиолошки за да се утврдат контактите и да се предупредат сите можни изложени лица.

Достапни вакцини и повик до родителите

По посетата на Стоматолошкиот клинички центар, Клековски посочи дека има зголемено ниво на вакцинирање и дека има доволно залихи на вакцини. "Знам дека имаме зголемено ниво на вакцинирање. Имаме доволно на залиха вакцини, така што мислам дека на почетокот имавме околу 15.000, има и други достапни количини," рече тој.

Министерот демантираше дека Министерството за здравство или која било друга здравствена институција испратиле препораки до Министерството за образование или до Министерството за социјална политика да бараат потврди за вакцинирање.

Клековски го упати апелот до родителите и го нагласи доброволниот карактер на вакцинацијата, предупредувајќи против дезинформациите на антиваксерските групи: "Ниеден дел од здравствените власти нема испратено препорака до соодветните други установи, зборуваме за образование за непримање на деца. Нашето апелирање е до родителите дека со невакцинирањето ги изложуваат сопствените деца, бебињата на ризик. Чинот на доброволност го нагласувам за да се избегнат моментите на постојните групи на антиваксери кои сметаат дека ова е повторно некаков заговор за да ги тераме родителите да ги вакцинираат децата. Нема никаков заговор. Моите деца се вакцинирани кога било време да бидат вакцинирани не отпосле. Апелирам до сите родители нема подобра заштита за сипаници од вакцинација. Сите заедно како општество треба да се вклучиме со јасна волја дека ова е единствен начин да спречиме епидемија и дека сите треба да направиме чекор кон тоа. Нема потреба да се закануваме, да присилуваме, да се фалсификуваат потврди и што уште не да се прави," додаде Клековски.

Здравствените служби ќе продолжат со епидемиолошко следење и лабораториско тестирање на сомнителниот случај, а министерот ги повика родителите да ги вакцинираат децата за да се спречи понатамошно ширење на заразата.

Фото: прес-материјал од настанот