Македонија има државен дата-центар покрај Прилеп — оперативен уште од 2023 година

Македонија има државен дата-центар уште од 2023 година: монументален, заштитен ИКТ центар изграден на два километри од Прилеп, со цел да ги зачува и обнови клучните информатички системи при катастрофи или други дефекти.

Инвестицијата од страна на Министерството за внатрешни работи изнесува 11,5 милиони евра. Објектот, како што се истакнува, е прв ваков државен проект во регионот и служи како резервно место за чување на податоците и за брзо опоравување во итни случаи.

Архитектура и слоеви на заштита

Проектот е дело на белградското студио „1Х2 Студио“ предводено од м-р Зоран Абадиќ. Концептот подразбира „соба во соба“ — серверската просторија е целосно изолирана во внатрешноста, а околу неа се формира кружен простор за машински, електрични и телекомуникациски инсталации и за простории на провајдерите.

Градежното решение нагласува физичка издржливост: таванот, ѕидовите и покривот се без отвори, изградени од двојни масивни армирано-бетонски ѕидови исполнети со високоефикасни противпожарни материјали. Пристапот до објектот е строго ограничен и е дозволен исклучиво за службени лица за време на официјални посети.

Во објектот е предвиден посебен сектор за мрежни техничари, оператори и физичко обезбедување кои работат 24/7. Безбедносниот систем вклучува двојни армирано-бетонски ѕидови со термичка и противпожарна изолација, дополнителна заштитна ограда, 24-часовен видео‑надзор и вооружено физичко обезбедување.

Според надлежните, техничките перформанси и нивото на физичка заштита ги исполнуваат стандардите на современите безбедносни објекти од западните земји, што ги подобрува капацитетите за заштита на инфраструктурата во Северна Македонија и на Западниот Балкан.

Фото: прес-материјал од настанот