„Мало, исплашено, но живо“ — пожарникарите спасија теле од пожарот на Китка

Пожарникарите од Противпожарната бригада на Град Скопје спасиле мало теле кое било оставено на опожарениот терен за време на големиот пожар над селото Палиград на планината Китка.

Од Центарот за управување со кризи информираат дека животното било исплашено и беспомошно, но дека пожарникарите успеале да го извлечат од опасната зона. Директорот на Центарот, Мухамед Али, ја сподели фотографијата и поврзаниот опис на својата Фејсбук-страница.

Спасување меѓу пепел и пламен

„Вчера додека бев на лице место на големиот пожар над селото Палиград, на планината Китка, покрај тешката борба со пожарот имавме и една несекојдневна и убава случка. Во метежот и огнот, пожарникарите од Противпожарната бригада на Град Скопје успеаја да спасат едно мало теле кое останало на опожарениот терен. Мало, исплашено, но живо – една мала победа во тешкиот ден.Во вакви моменти, секој спасен живот е важен. А денес, меѓу огнот и пепелта, успеавме да спасиме и едно мало суштество. За жал, пожарите не ја загрозуваат само природата, имотот и животите на луѓето. Загрозени се и животните, кои често остануваат беспомошни пред огнената стихија“, објави на Фејсбук Али.

Тој апелираше до граѓаните да внимаваат и да постапуваат одговорно додека екипите продолжуваат да се справуваат со пожарот.

„Пожарите, без разлика дали се подметнати или избувнуваат поради невнимание, оставаат последици врз сите живи суштества. Да ја чуваме природата, да ги заштитиме луѓето, имотот и животните“, порача Али.

Спасувањето на телето потсети дека огнените линиишта ги погодуваат не само луѓето и имотот, туку и домашните и дивите животни во погодената област.

Фото: ЦУК