Мицкоски: Без намалување на акцизата и ДДВ, дизелот ќе беше поскап за околу 11 денари по литар

Премиерот Христијан Мицкоски изјави дека донесените одлуки за намалување на акцизата и за намалување на ДДВ спречиле раст на цената на дизел-горивото од околу 11 до 11,5 денари по литар во однос на сегашната цена. Според него, мерките придонеле за значителни дневни заштеди за домаќинствата и бизнисот во услови на нарушени снабдувачки пазари.

Мицкоски посочи дека се зголемила продажбата на гориво на македонските бензински станици, особено на оние блиску до северната, западната и јужната граница, поради притисок од граѓани што пристигнуваат од Грција, Албанија и Србија.

Временска намалена стапка на ДДВ за дизел

Објаснувајќи ги пресметките, тој рече: "Стигнавме до повеќе од два милиони литри гориво што се точи на македонските бензиски станици. Имајќи предвид дека отприлика 70 отсто е дизел-гориво, тогаш доаѓаме до некаде околу 1 400 000–1500 000 литри. Тоа значи дека само по основ на дизелот, дневната заштеда на македонските граѓани е повеќе од 250 000 евра. Или ако се земе предвид две недели и доколку се земе предвид веќе намалената царина, односно акцизата за безоловниот 95 и 98-октански, тогаш доаѓаме до бројка помеѓу 4,2 и 4,5 милиони евра, што е директна заштита што ја имаат македонскиte граѓани. Индиректната заштита се проектира во ниската стапка на инфлација", кажа тој.

Владата донесе одлука за привремено намалување на ДДВ-то за дизел-горивото од 18 на 10 отсто со цел ублажување на ценовниот удар. Повластената даночна стапка ќе важи од полноќ на 15 септември до 28 септември.

Мицкоски истакна дека во моментов во земјата имаат една од најниските малопродажни цени на дизелот и на безоловниот 95 и 98-октански бензин во регионот и дека цените се значително под оние во многу земји од Европската Унија. "Ако се спореди со цената што ја имаат нашите соседи, па и во Европа, тогаш разликата е 20 и 50 отсто. Тоа значи дека Владата води сметка во рамки на своите можности, но и повеќе од тоа за да го заштити стандардот на граѓаните", додаде тој. Тој нагласи дека само нашиот северен сосед Србија има за некоја 0,3-0,2 пониска стапка на инфлација.

Регулаторната комисија за енергетика (РКЕ) на својата седница усвои нови малопродажни цени: бензините поскапуваат за три и пол денари по литар, а дизелот поевтинува за два денари. Новите официјални цени се: еуросупер БС-95 — 100,50 денари за литар, еуросупер БС-98 — 102,50 денари за литар, и дизел — 99 денари.

Фото: прес-материјал од настанот