Мицкоски: Дата-центрите се иднината — стојам позади изградбата на оваа индустрија

Премиерот Христијан Мицкоски денеска го оцени развојот на дата-центрите како стратешка шанса за земјата, по посетата на Општина Берово и во контекст на одлуката на Советот на Општина Пехчево.

Советот на Пехчево ја отфрли иницијативата

Советот на Општина Пехчево на 25 август едногласно ја отфрли иницијативата за изградба на дата-центар во градот. Против гласаа сите деветмина советници — петмина од ВМРО‑ДПМНЕ и коалицијата, тројца од СДСМ и коалицијата и еден од Движење ЗНАМ.

Во изјавата пред новинарите, Мицкоски рече: „Ќе се градат data-центри оти тоа е иднината на човештвото. Ние едноставно треба да одлучиме како држава дали сакаме да бидеме лидери во регионот или повторно да бидеме на дното. Ако сакаме да бидеме лидери, тогаш тоа е иднината и јас апсолутно, и политички и како професор и како инженер, стојам позади изградбата на оваа индустрија и ќе ја поддржам целосно“, по посетата на Општина Берово.

Опозициската СДСМ го критикуваше предлогот, повикувајќи внимание на ризиците регистрирани во други држави — пред сè потрошувачката на електрична енергија, бучавата и користењето на водните ресурси — што го отворија прашањето за локалните согласности и влијанието врз животната средина.

Мицкоски ги оцени тие критики како делумно невистинити и застарени: „Ги слушам оние полемики кои доаѓаат од опозицијата. Далеку од вистината е тоа што го кажуваат. Замислете што би се случувало со светските мултинационални компании кои имаат вредност од неколку трилиони долари ако тие влијаеле негативно врз квалитетот на животот на граѓаните. Гледам јавна дебата на некои од медиумите блиски до опозицијата што ги испраќаат пораките кој ќе ја плати струјата. Струјата ќе ја плати оној што ќе ја троши, по цена која ќе ја договори на слободниот пазар. Кога станува збор за системот на ладење, и тука сакам да кажам дека испраќаат пораки кои се стари 10, 15, 20 години. Има сосема поинакви начини на ладење, во зависност од намената на тие дата-центри, дали тие ќе се користат за вештачка интелигенција или за други цели“, додаде Мицкоски.

Тој информираше дека во земјата постои секундарен дата-центар во Прилеп, а во рамките на реформската агенда на Владата е предвиден проект за изградба на национален дата-центар кој преку систем за интероперабилност ќе ги собере институциите на едно место.

Фото: К. Попов)