Мицкоски прашан за „ментор“ Вучиќ, расправија во Собрание

Лични прозивки и остри тонови го обележаа денешниот собраниски ден за пратенички прашања, откако лидерот на СДСМ, Венко Филипче, директно го праша премиерот Христијан Мицкоски дали Александар Вучиќ е неговиот ментор, кога ќе го врати името и дали обезбедил подобар договор со ЕУ на патот кон евроинтеграциите. Филипче нагласи дека, иако се обраќа кон премиерот како функционер, лично не го почитува Мицкоски, на што премиерот возврати со критика за „лошото воспитување“ на опозицискиот лидер.

Спорот за Брвеница и прашањето за гласањето по етнички клуч

На седницата се отвори и темата за предвремените локални избори во Брвеница, откако пратеникот Скендер Реџепи оцени дека тоа ќе биде битка меѓу оние кои потиснуваат и оние кои се потиснати и дека премиерот претходно повикал на гласање по етнички клуч.

Мицкоски одговори дека е свесен за појави кои повикуваат на етничко гласање, но дека очекува поддршка за кандидатот на ВМРО-ДПМНЕ во Брвеница. Собранискиот спикер Гаши по брифингот со новинарите порача дека е илузорно во 21 век да се зборува за гласање по етнички клуч и дека изборот треба да го направат граѓаните според личните убедувања и квалитетите на кандидатите кои влегоа во вториот круг, чија одржување е најавено за недела.

Најголемо внимание привлече и прашањето за рудниците. Премиерот ја повтори својата посветеност на проектот за антимон во Луке и ги образложи законските постапки поврзани со Казандол и Иловица. Опозицијата пак, ја искористи можноста да потсети на задолжувањата и кредитите, вклучително унгарскиот заем и, како што велат, сомнителните трансфери на пари од Србија.

Мицкоски возврати дека дел од новите кредити се користат за отплата на стари долгови наследени од претходната влада и ја бранеше постапката по рударските проекти. Седницата заврши со присутна напнатост меѓу пратеничките групи додека расправаа низ низа материјални и лични теми.

Фото: прес-материјал од настанот