Мицкоски во Вашингтон: нови инвестиции и продлабочување на партнерството со DFC

Премиерот Христијан Мицкоски предводеше владината делегација во Вашингтон со цел продлабочување на стратешкото партнерство со САД и отворање на нови економски и инвестициски можности за земјата. Посетата ги споила политичките средби со напори за привлекување приватен капитал во клучни сектори.

Средби со ДФЦ, конгресмени и бизнис структури

Делегацијата имала состанок со главната директорка за политики и развој на Американската корпорација за меѓународен финансиски развој – ДФЦ (DFC), Каролин Вик, на кој се разговарало за можностите за продлабочување на соработката и потенцијални инвестиции во Македонија, со посебен акцент на енергетиката и високите технологии.

Од владината прес-служба посочуваат дека ДФЦ располага со инвестициски капацитет од 205 милијарди долари и претставува значаен инструмент на САД за мобилизирање приватен капитал и инвестиции во стратешки сектори. „На средбата се разговараше за можностите за продлабочување на соработката и потенцијални инвестиции во Македонија во повеќе области, со посебен акцент на енергетиката, високите технологии и други стратешки сектори. DFC во своето работење посебен фокус става на енергетиката, современата инфраструктура и напредните технологии, а по проширувањето на нејзините овластувања располага со значително поголем капацитет за меѓународни инвестиции“, се вели во соопштението.

Мицкоски потсети дека ДФЦ веќе има присуство во земјата преку инвестицијата во проектот „Крстовдол“, во јавноста познат како „Антимон“, и дека институцијата пројавила интерес за други проекти, додека намерата на Владата е „подлабоко да ги понудиме нашите капацитети”.

Од политички аспект, премиерот имал средба со конгресменот Keith Self, претседател на Поткомитетот за Европа во Комитетот за надворешни работи на Претставничкиот дом, на која биле разгледани значењето на стратешкото партнерство и можностите за понатамошно продлабочување на соработката. На средбата со конгресменката Claudia Tenney, сопретседавачка на Македонската група за пријателство во Конгресот, било истакнато значењето на традиционално силните пријателски односи и парламентарната соработка.

Владата ја оценија посетата како продолжување на напорите за преточување на стратешкото партнерство во конкретна економска соработка, нови инвестиции и проекти од интерес за државата. Пред отпатувањето, Мицкоски најави и разговори со компании од воената индустрија кои Владата сака да ги привлече да инвестираат, со посебен осврт на полигонoт „Криволак“. „Во фаза сме на изработка на нов закон со Министерството за одбрана, да го понудиме нашиот тренинг-полигон 'Криволак'", рече тој.

Фото: Влада на РСМ, Сектор за односи со јавност