Ura 'Gjeneral Mihajlo Apostolski' përkohësisht pa lidhje me bulevardin, drejt East Gate përmes rrugëve të qasjes

Mënyra e lidhjes së urës "Gjeneral Mihajlo Apostolski" me zonën e East Gate në Shkup do të jetë përkohësisht përmes rrugëve të qasjes, ndërsa lidhja përmes një bulevardi shtesë është shtyrë, tha kryetari i qytetit të Shkupit.

Kryetari: ura do të jetë plotësisht funksionale brenda javësh

Orce Gjorgjievski deklaroi në një intervistë televizive se procesi i ekspropriimit është përfunduar dhe se ndërtesat përgjatë traseës janë prishur. “Ekspropriimi është përfunduar, ndërtesat janë rrënuar dhe po bëjmë përgatitje për tampim dhe asfaltim që do të përfundojë brenda 20 ditëve të ardhshme, me çka do t'i mundësojmë funksionalitetin e plotë të urës. Qëllimi përfundimtar do të jetë edhe t'i përfundojmë ato objekte që çojnë nga ana e majtë drejt 'East Gate',” tha ai.

Për pyetjen nëse ura do të lidhet drejtpërdrejt me East Gate, kryetari sqaroi se aktualisht trafiku do të përdorë rrugët e qasjes dhe jo një zgjidhje të re me bulevard për shkak të lëndëve të pazgjidhura gjyqësore.

“Kjo është ajo që e premtova gjatë fushatës, duke marrë parasysh se atje ka shumë lëndë që janë në procedura gjyqësore. Pra, nuk do të ketë zgjidhje me bulevard, por siç e premtova, do të ketë funksionalitet të plotë të urës,” shtoi Gjorgjievski.

Ndërtimi i urës nisi në vitin 2020, gjatë mandatit të kryetarit të atëhershëm Petre Shilegov, si pjesë e projektit për zgjatjen dhe zgjerimin e bulevardit ASNOM dhe për lidhjen më të mirë të komunave Aerodrom, Gazi Baba dhe Centar. Strukturat kryesore u përfunduan në vitet në vijim, por hapja u vonua për shkak të çështjeve të papërfunduara pronësore dhe ekspropriimeve.

Sipas autoriteteve komunale, pasi ura të jetë funksionale dhe të përfundojnë punimet në trasë, pritet një lehtësim i ngarkesës së trafikut në zonat e Aerodrom dhe Gazi Baba. Prishja e objekteve të mbetura në trasë pritet të fillojë nesër, tha kryetari.

Foto: Fejsbuk