Мрежата за заштита од дискриминација е против предлогот неработните денови да бидат предмет на договор меѓу работниците и работодавачите

Мрежата за заштита од дискриминација излезе со реакција против предлогот на Стопанската комора неработните денови да станат предмет на индивидуално договарање меѓу работниците и работодавачите, со образложение дека правата на работниците мора да останат законски загарантирани.

Според Мрежата, користењето на правата не смее да зависи од волјата на работодавачот или од преговарачката позиција на работникот, особено кога станува збор за работници со пониски примања и несигурни форми на вработување кои се најизложени на притисоци.

Мрежата бара социјален дијалог и заштита преку колективни договори

Во реакцијата таа нагласува дека "– Работничките права мора да бидат заштитени со закон и колективни договори. Нивното користење не смее да зависи од волјата на работодавачот или од преговарачката моќ на работникот – се наведува во реакцијата."

Мрежата предупредува дека индивидуалното договарање за користење на неработните денови може да доведе до ситуации во кои работниците, стравувајќи за своето работно место, ќе се откажуваат од правата што им следуваат, и додава оти ниту работодавачите ниту Стопанската комора не треба да одлучуваат кој и под какви услови може да користи празник како неработен ден.

Таа бара сите евентуални измени што ги засегаат работничките права да бидат предмет на социјален дијалог меѓу Владата, синдикатите и работодавачите и апелира до Владата да не прифаќа префрлање на постојните права од законска гаранција во сферата на индивидуалното договарање, вклучително и да се задржи постојаната заштита која предвидува дополнителен неработен ден кога празник паѓа во недела.

Во заклучок Мрежата порача: "Ни требаат подобри услови за работа, силни колективни договори и вистински социјален дијалог. Работничките права не се предмет на пазарење – порачуваат од Мрежата за заштита од дискриминација."

Фото: Novica Nakov / Wikimedia Commons (CC BY-SA 2.0)