МВР: 10.411 сообраќајни прекршоци од мај до август 2026

Министерството за внатрешни работи информира дека во засилените контролни акции спроведени од мај до август 2026 година се констатирани вкупно 10.411 сообраќајни прекршоци, насочени кон возачи на електрични тротинети, велосипеди, мопеди, мотоцикли, трицикли и четирицикли.

Најмногу прекршоци кај мопеди и мотоцикли

Според податоците на МВР, 8.806 прекршоци биле регистрирани кај возачи на мопеди, мотоцикли и трицикли. За електрични тротинети се регистрирани 1.571 прекршок, а за велосипеди 34.

Најчесто констатиран прекршок било некористењето заштитен шлем — за тоа биле изречени 7.303 санкции. Исто така, се евидентирани 718 прекршоци за управување по несоодветна површина, 401 за управување нерегистрирани возила или возила без полиса за осигурување и 322 за некористење рефлектирачки елек.

Во рамки на контролите откриени се и 81 случај на управување од лица помлади од 18 години и 45 случаи на управување под дејство на алкохол, додека други 1.541 прекршок се однесуваат на различни видови повреди на правилата.

Покрај прекршоците, полицијата открила 619 кривични дела: 604 се за управување возило без возачка дозвола, 14 за управување под дејство на алкохол и едно за управување во забранет правец. Одземени се вкупно 423 возила — 20 електрични тротинети и 403 мопеди, мотоцикли и трицикли.

МВР соопшти дека засилените сообраќајни контроли ќе продолжат и во наредниот период со посебен акцент на прекршоците што директно ја загрозуваат безбедноста на учесниците во сообраќајот. Министерството апелира до возачите да ги почитуваат сообраќајните правила, да користат заштитна опрема, да не управуваат под дејство на алкохол и да не учествуваат во сообраќајот без исполнување на законските услови.

Фото: прес-материјал од настанот