МВР: Во јули околу 55 000 барања за лични документи, процесот тече без застој

Министерството за внатрешни работи (МВР) соопшти дека во текот на јули биле примени околу 55 000 барања за издавање лични документи, вклучително и патни исправи. Според институцијата, порастот во бројот на барања е карактеристичен за летниот период и е поврзан со присуството на голем број наши иселеници во земјата.

„Министерството им препорачува на граѓаните од дијаспората навремено да ја проверат важноста на своите документи и доколку има потреба, барањето за нова патна исправа да го поднесат веднаш по пристигнувањето во државата, имајќи предвид дека во моментов редовната постапка овозможува издавање на документите во кратки рокови“, велат од МВР.

Од МВР нагласуваат дека процесот на издавање патни исправи се одвива непречено. Термин за поднесување барање во редовна постапка се добива во рок од еден до два дена, а документите граѓаните ги добиваат во рок од најмногу седум дена.

Работно време и реорганизација

За да одговори на поголемото оптоварување, Министерството спроведе внатрешна реорганизација: дел од одделенијата работат во две смени, а дел со продолжено работно време. Одделението за управни работи Скопје и Отсекот за управни работи Тетово работат од понеделник до петок од 07:30 до 19:30 часот. Отсеците за управни работи во Битола, Велес, Куманово, Охрид, Струмица и Штип работат од понеделник до петок од 08:00 до 18:00 часот.

Исто работно време (08:00–18:00) важи и за ОУР Битола за Прилеп, ОУР Велес за Кавадарци, ОУР Охрид за Кичево и Струга, ОУР Тетово за Гостивар и ОУР Штип за Кочани. Во останатите подрачни единици – ОУР Охрид за Дебар; ОУР Битола за Крушево, за Демир Хисар, за Ресен и за Македонски Брод; ОУР Штип за Пробиштип, за Свети Николе, за Виница, за Делчево и за Берово; ОУР Велес за Неготино; ОУР Куманово за Кратово и за Крива Паланка; ОУР Струмица за Гевгелија, за Радовиш и за Валандово – работното време ќе трае од 08:00 до 16:00 часот.

Во Скопје, во зградата на МРТВ, пред нешто повеќе од една година беше пуштен во употреба реконструираниот дел од Одделението за управни работи – Скопје. Тогаш министерот за внатрешни работи Панче Тошковски изјави: "Целта на реконструкцијата е граѓаните да имаат можност за брзи и ефикасни услуги, да го штедат своето време и сето тоа да биде на достоинствен начин како што заслужува секој македонски граѓанин. Со реконструкцијата и реновирањето засега опфатени се 20 т.н. кабини за сликање кои ќе извршуваат повеќе работни функции и ќе даваат повеќе услуги на граѓаните, реконструирана е големата шалтер сала која во наредниот период ќе ги опслужува граѓаните во делот на издавањето на пасошите по итна и редовна постапка, личните карти по итна постапка, возачките дозволи, уверенија за државјанства заедно со сите останати постапки во врска со барањата за прием и отпуст од државјанства, промена на лично име и други, како и услуги од областа на возилата".

Министерството повторно ја упатува препораката до граѓаните од дијаспората да ја проверат важноста на своите лични документи и, ако е потребно, веднаш по пристигнувањето да поднесат барање за издавање пасош, при што редовната постапка овозможува брзо и ефикасно постапување со апликациите.

Фото: прес-материјал од настанот